දේවමාතා ප්‍රාර්ථනාව සවිස්තරාත්මකව
දේවමාතා ප්‍රාර්ථනාවේ දේවමාතාවන්ගේ කන්‍යාභාවය අරබයා ඇති ප්‍රධාන වගන්ති තුන
- අතී වෘථවූ මාතාවෙනි - ලතින් Mater Castissima යෙදුම සඳහා මෙම සිංහල යැදුම යොදා ඇත. මෙහිදී අරුත් ගැන්වෙන්නේ දේව මාතාවන්ගේ කන්‍යාභාවය, නිර්මලත්වය හා පවිත්‍රත්වයයි. "වෘථවූ" යන්නේන් වෘථශුද්ධිය අදහස් වේ. මේ සඳහා ඉංග්‍රීසියෙන් Mother Most Chaste යන්න යෙදේ.
- කන්‍යාවෘත අභින්නවූ මාතාවෙනි - දේවමෑණියන්ගේ කන්‍යා වෘථය එනම් නිර්මලත්වය නොබිඳුණු එනම් භින්න නොවූවක් බව මින් ප්‍රකාශ වේ. "අභින්න" යනුවෙන් එම නොබිඳුණු යන අදහස පෙන්නුම් කෙරේ. එය එන්නේ ලතින් Mater Inviolata (Mother Inviolate) ඇසුරිනි.
- කන්‍යාශුද්ධ අනූනවූ මාතාවෙනි - මෙයද දෙව්මවුන්ගේ කන්‍යාභාවය අරබයා නිර්මාණය වූවකි. ඕතොමන්ගේ නිර්මලත්වයේ , කන්‍යාභාවයේ කිසිදු අඩුවක් නොමැති බව ඉන් පැවසේ. කන්‍යාශුද්ධ භාවය ඌන නොවී එනම් අනූනව එතුමිය තුළ පවතින බව ඉන් අදහස් කෙරේ. මෙය ලතින් Mater Intemerata ( Mother Undefiled ) ඔස්සේ ගොඩනැගුණකි.
ඉහත යැදුම් වගන්ති ත්‍රිත්වය දේවමාතාවන්ගේ කන්‍යාභාවය අරබයා ප්‍රාර්ථනය තුළ හමුවන යැදුම් වේ.
ආශ්චර්ය යුක්තවූ මාතාවෙනි
ලතින් බසින් Mater Admirabilis යන වගන්තිය සිංහල දේවමාතා ප්‍රාර්ථනාවේ හමුවන්නේ ආශ්චර්ය යුක්තවූ මාතාවෙනි යනුවෙනි. Admirabilis යන වදනේ පුදුමය යන අදහස ගැබ්ව පවතී. කෙසේවෙතත් ඉංග්‍රීසියෙන් යෙදෙන Mother most admirable යන යෙදුමෙන් පැසසුමට , ඇගයුමට සුදුසු මාතාව යන අදහසද පැනනඟී.
දෙව්මවුන්ගේ ජීවිතය තුළ දෙවිඳෝ මහත් ආශ්චර්යවත් දේ කළ සේක. "එතුමාණෝ මා උදෙසා මහත් දේ කළ සේක" යනුවෙන් එතුමිය සිය උදාන ගීයේ දෙවිඳුන් පසසන්නේ එබැවිනි. මංගලම් කීමේ අවස්ථාවේ දී දෙවියන් වහන්සේ ද සිය දූතයා මඟින් පවසන්නේ එතුමිය දේව ප්‍රසාදයෙන් පූර්ණ තැනැත්තිය බවයි. එසේම ශුද්ධාත්මයාණන් වහන්සේ එලිසබෙත් තුමියගේ මුවින් පවසනුයේ එතුමිය වනිතාවන් අතරින් ආශිර්වාද ලද්දී බවයි. මේ අනුව මරිය තුමිය දෙවිඳුන්ගෙන්ම නිසි ඇගයුමට ලක්වූ බව පෙනේ.
"අරුණාලෝකය මෙන් නැඟී එන, සඳ මෙන් රුව ඇති, ඉර මෙන් දිළිසෙන, කොඩිගත් සේනාවක් මෙන් බලසම්පන්න මේ තැනැත්තිය කවරෙක්ද ?" යනුවෙන් ප්‍රේම ගී හී කතුවරයා දිවැස් ප්‍රකාශනයක් සේ ඉදිරිපත් කරන්නේ දෙව්මවුන්ගේ මේ ආශ්චර්යවත් භාවය යැයි මරිය බැතිය පිළිබඳ ඉගැන්වීම් තුළ අපට හමුවේ. විශේෂයෙන්ම මරිය හමුදාවේ නිල යැදුම්වල මේ ශු. ලියවිලි කොටස අඩංගු වේ.
මේ අනුව දෙව්මවුන් තුළ පිය දෙවිඳුන් පෑ අසිරිමත් පෙළහර නිසාවෙනුත්, එතුමියගේ දිවිය තුළ විද්‍යාමාන වන ආශ්චර්යවත් භාවය නිසාවෙනුත් ඕතොමෝ ආශ්චර්ය යුක්තවූ මාතාව නමින් හැඳින්වේ.
1844 ඉතාලියේ රෝම පුරවරයේ ආරාමයක විසූ ආධුනික පැවිදි වරියක වූ ප්‍රංශ ජාතික පොලින් විසින් අඳින ලද බිතුසිතුවමක් දුටු එවකට ශුද්ධාසනය හෙබවූ අතිඋතුම් IX පියුස් පාප්තුමා 1846 දී එම සිතුවම ආශ්චර්ය යුක්තවූ මාතාව නමින් හඳුන්වා ඇත. එය සුපුරුදු ආරෙන් පිට වෙනස්ම ස්වරූපයකින් ඇඳ ඇති සිත්තමකි.
අප සිරිලක මේ දේවමාතා විරුදාවලිය දරන දේවස්ථානයක් අගරදගුරු වසමේ කඳාන නගරයට නුදුරින් හපුගොඩ ග්‍රාමයේ පිහිටා ඇත. එහි ඉහත බිතුසිතුවමට අනුව නිර්මාණය වූ ප්‍රතිමා හමුවේ.
ආශ්චර්ය යුක්තවූ මාතාවෙනි අප නිසා යාච්ඤා කළ මැනව.
යහපත් අනුශාසනාදායකවූ මාතාවෙනි
දේවමාතාවන් වහන්සේ යහපත් අනුශාසනාදායකවූ මාතාව යනුවෙන් හැඳින්වීම මඟින් අදහස් කෙරෙන්නේ එතුමිය මනුබව ගත් දේව පුත්‍රයා වන කුඩා ජේසු තුමන්ට අවවාද අනුශාසනා දෙමින් නිසි මඟ පෙන්වමින් ඉටුකළ භූමිකාවයි. එතුමිය දේව පුත්‍රයාගේ මව වීම මඟින් එකී වගකීම ඉටුකිරීමේ කැඳවීම ලැබුවාය. එතුමිය එම වගකීම කුඩා ජේසු තුමන් හමුවේ පමණක් නොව ප්‍රසිද්ධ ජීවිතය ආරම්භ කළ ජේසු තුමන් හමුවේද ක්‍රියාත්මක කළ අයුරු කානා හී විවාහය අවස්ථාවේ අපට දැකිය හැක.
එතුමිය ජේසු තුමන් රැකබලා ගත් සේ, කුරුසිය පාමුලදී ලද සුවිශේෂී කැඳවීම අනුව යමින් සාන්ත සභාව ද රැකබලා ගනිමින් ඊට අනුශාසනා කරන්නීය. එමනිසා අපිදු අපේ ජීවිතයට අවැසි මඟපෙන්වීම පතා එතුමියගේ මැදිහත්කම පැතිය යුතුය. එවිට එතුමිය අපට නිසි අනුශාසනා ලබාදී කිතු සමිඳුන් වෙත අප මෙහෙයවමින් රැගෙන යනු ඇත. ලතින් බසින් Mater Boni Consilii යනුවෙන් ද ඉංග්‍රීසියෙන් Mother of Good Counsel නමින්ද හැඳින්වෙන්නේ මේ නාමයයි.
මරියාවන්ගේ මේ විරුදාවලිය ඈත අතීතයේ සිට පැමිණෙන්නකි. ක්‍රි.ව. 4 සියවසේ රෝමයට ඔබ්බෙන් පිහිටි ජෙනත්සානෝ නම් ප්‍රදේශයේ ගොඩනැගුණු දේවස්ථානයක් යහපත් අනුශාසනා දායකවූ මෑණියන් නමට කැපකර ඇති අතර පසුකාලීනව 1356 දී එම පුදබිම අගුස්තීනු නිකායික පැවිද්දන්ට බාර දී ඇත. එම දේවස්ථානයේ දක්නට ලැබෙන දෙව්මවුන් හා ජේසු බිළිඳුන් නිරූපිත බිතුසිතුවමටද පසුකාලීනව දේවස්ථානයේ නාමයම යෙදුණි. ඒ අනුව එම සිත්තම යහපත් අනුශාසනා දායක වූ මාතාව ලෙස හැඳින්වෙන්නට වන. ඉතිහාසයේ විටින් විට උද්ගත වූ විවිධ ව්‍යසන මධ්‍යයේ පවා එම සිතුවම සුරැකී තිබූ අතර එහි විශේෂත්වයක් වනුයේ මරියෝත්තමාවෝ අඩක් ක්‍රිස්තුස් වහන්සේ දෙසත් අඩක් එම සිතුවම දෙස බලන අප දෙසත් බලා සිටින පරිදි ඇඳ තිබීමය.
බොහෝ ශුද්ධෝත්තම පාප්වරු යහපත් අනුශාසනා දායක මෑණියන් වෙත වෙසෙසින් බැති පෙම් පෑහ. අතිඋතුම් XIII ලියෝ සුදතුම් පියා ඒ අතර කැපීපෙනෙන්නෙකි. උන්වහන්සේ මේ නාමය අරබයා ධවල සළු ධාතුවද (The white scapular) අනුමත කර ඇත. එතුමි වෙනුවෙන් විශේෂ මංගල්‍යයක් අප්‍රේල් 26 දිනට යෙදේ.
යහපත් අනුශාසනා දායක මාතාවන්ට කැපකළ දේවස්ථානයක් මෙරටත් හමුවේ. ඒ කොළඹ අගරදගුරු වසමේ කමරගොඩ මීසමට අයත් වඩුමුල්ල දේවස්ථානයයි.
යහපත් අනුශාසනා දායකවූ මාතාවෙනි අප නිසා යාච්ඤා කළ මැනව.
ශ්‍රේෂ්ඨි ඇදුරාගේ මාතාවෙනි
රක්ෂාධිකාරහුගේ මාතාවෙනි
"Mater Creatoris" යනුවෙන් ලතින් දේවමාතා ප්‍රාර්ථනාවේ හමුවන යැදුම සිංහල පරිවර්තනයට ලක්වී ඇත්තේ තරමක් වෙනස් ස්වරූපයකිනි. මෙහි ලතින් වදනේ සෘජු අරුත "මැවුම්කරුවාණන්ගේ මාතාවෙනි" වැනි අදහසක් පෙන්නුම් කළද අප දකින්නේ ශ්‍රේෂ්ඨි ඇදුරාගේ මාතාවෙනි කියාය.
දෙවිඳුන්ගේ මැවිලි අතර මරිය වහන්සේට හිමිවන්නේ අද්විතීය තැනකි. එහෙත් මෙහිදී ඕතුමිය නම් කෙරෙන්නේ මැවුම්කාරයාණන්ගේ මාතාව ලෙසිනි. මේ ප්‍රකාශය සෘජුවම "දේවමාතාව" යන නාමය හා සබැඳේ. මරිය තුමිය දෙවිඳුන්ගේ මාතාව වනුයේ යම්සේද එලෙසම එතුමිය මැවුම්කාරයාණන්ගේ මාතාවද වේ. එසේ වනුයේ දෙවියන් වහන්සේ හා ජේසුස් ක්‍රිස්තුස් වහන්සේ හැම අතින්ම සමාන වන හෙයිනි. ක්‍රිස්තුස් වහන්සේ සියට සීයක්ම දෙවියන් වහන්සේ වන හෙයින් ක්‍රිස්තුස් වහන්සේගේ මව දේව මාතාව වන බව අතීතයේ මන්ත්‍රණ සභා හරහා නිල වශයෙන් පිළිගෙන ඇත.
"සියල්ල උන්වහන්සේ කරණකොටගෙන මවන ලදි. උන්වහන්සේ නොමැතිව මවන ලද කිසිවක් නොවීය." (ජොහාන් 1,3) මේ අනුව පුත්‍රයාණන් වහන්සේ ද මැවුම්කාරයාණන්ගේ කාර්යයේ පංගුකාරිත්වය දැරීය. එමනිසා පුත්‍රයාණන් වහන්සේගේ මෑණියන්ට මැවුම්කාරයාණන්ගේ මව යනුවෙන් හැඳින්වීමට සභා මාතාව පියවර ගෙන ඇත.
සිංහල පරිවර්තකයා මෙහිදී ගෙන ඇත්තේ වෙනස්ම වදනකි. ඔහු මැවුම්කාරයාණන් දකින්නේ උත්තරීතර ගුරුවරයා ලෙසිනි. ඇදුරා හෙවත් ගුරුවරයා වනාහි නිර්මාපකයෙකි. යමක් හෝ යමෙක් අලුතින් බිහිකරන්නෙකි. ඒ අනුව ජේසුස් ක්‍රිස්තුස් වහන්සේ අපගේ උතුම් ගුරුදේවයාණන් හෙවත් නිර්මාපකයාණෝය. මරියෝත්තමාවෝ ඒ උතුම් ඇදුරාණන්ගේ මෑණියෝය. ශ්‍රේෂ්ඨි ඇදුරාගේ මාතාව යනුවෙන් නම් කර ඇති සිතුවමේ ජේසු බිළිඳා ලෝකය තම අතේ හොවාගෙන සිටින ස්වරූපයක්ද, මරියාවෝ රාජ යෂ්ටියක් අතින් ගෙන වළාකුළු වලින් මතුව සිටින ස්වරූපයක් ද නිරූපිතය.
"රක්ෂාධිකාරහුගේ මාතාවෙනි" යන වැකිය එන්නේ ලතින් " Mater Salvatoris" ඇසුරිනි. එහි සෘජු අරුත වන්නේ ගැළවුම්කරුවාණන්ගේ මාතාව යන්නයි. අපගේ ගැළවුම්කරුවාණෝ එනම් ජේසුස් ක්‍රිස්තුස් වහන්සේ අපගේ ආරක්ෂකයාණෝ හෙවත් අපව මුදවාලන තැනැත්තා යන අදහසින් ගත් කල මේ යැදුම් පාඨයේ අරුත වටහා ගත හැක.
මේ යැදුම් කොටස් දෙකෙහිම අප දකින සුවිශේෂී තත්ත්වය නම් ලතින් මුල් යැදුමේ අරුත සෘජුවම සිංහල බසට පෙරළෙනවා වෙනුවට ඊට පර්යායව යන වෙනත් වදනක් ඈඳී තිබීමය.
විසාරද බුධ්‍යාග්‍ර වූ කන්‍යාවෙනි
දේවමාතා ප්‍රාර්ථනාවේ ' කන්‍යාවෙනි ' යනුවෙන් අවසන් වන යැදුම් මාලාවේ පළමු වැන්න අප යදින්නෙ විසාරද බුධ්‍යාග්‍ර වූ කන්‍යාවෙනි යනුවෙනි. මෙය හෙළ බසට පෙරළී ඇත්තේ ලතින් ප්‍රාර්ථනාවේ එන "Virgo Prudentissima" යැදුම් පාඨය ඇසුරිනි.
මෙම වදන් ද්වය ප්‍රඥාව, බුද්ධිය, දැනුවත්කම හා බැඳී පවතී. විසාරද හෙවත් විශාරද යන්නෙන් යම් කිසි විෂය ක්ෂේත්‍රයක හසල දැනුමක්, වියත් බවක්, උගත්කමක් හැඟවේ. බුධ්‍යාග්‍ර යන්නෙන් බුද්ධියෙන් අග්‍ර හෙවත් බුද්ධිමත් බවින් ඉහළ යන අදහස ප්‍රකාශ වේ.
මීට සමපාත වන ලතින් Prudentissima වදනට පර්යාය වන ඉංග්‍රීසි වචනය වන්නේ Prudence ය. එය මූලික ධර්ම ගුණ සතරෙන් පළමු වැන්නය. (Cardinal Virtues) කතෝලික සභා ධර්මෝපදේශය Prudence යන්න හඳුන්වන්නේ ස්ථානෝචිත ප්‍රඥාව ලෙසිනි. යහපත් දේ තීරණය කිරීමට හා එය අත්පත් කරගැනීමටත්, නිවැරැදි ක්‍රම තෝරාගැනීමටත්, ප්‍රායෝගික හේතු යෝග්‍ය ලෙස තීරණය කරන ධර්ම ගුණය මෙය වේ.
මේ අනුව මින් දේවමාතාවන් වහන්සේ ප්‍රඥාවන්තව ජීවිතයේ තීන්දු තීරණ ගත්, බුද්ධිමත් ලෙස හැසිරුණු උත්තමාවියක් ලෙස බුහුමනට ලක් වේ.
ඉන්පසු හමුවන සෙසු යැදුම් පහ කන්‍ය මරියාවන්ගේ ගෞරවනීයබව, ප්‍රශංසනීයබව, ශක්තිමත් භාවය, දයාවෙන් යුක්තබව හා විශ්වාස පක්ෂ භාවය මෙනෙහි කිරීමට අපට ඇරයුම් කරයි. මෙහිදී වන්දනීය වූ කන්‍යාවෙනි යන්න වරදවා වටහා ගැනීමට අවශ්‍ය නොවේ. එය ලතින් Virgo Veneranda වලින් එන්නකි. venerable යනු වන්දනාවට යෝග්‍ය යන අදහස නොව ගෞරවයට ලක්කිරීමට සුදුසු බවයි.
ධර්මනීති දර්පනෙනි
දේවමාතා ප්‍රාර්ථනාවේ හමුවන තවත් යැදුමක් වනුයේ ධර්මනීති දර්පනෙනි යන්නයි. Speculum Iustitiae යන ලතින් යැදුම් කොටස හෙළ බසින් මෙලෙස සකස් කර ඇත. මේ සඳහා ඉංග්‍රීසි පරිවර්තනය යොදන්නේ Mirror of Justice යන යෙදුමය.
Speculum යන්නෙන් දර්පනය හෙවත් කැඩපත හැඟවේ. දේවමාතාවන් කැඩපතක් ලෙස ඉදිරිපත් කර ඇත්තේ මන්ද ? කැඩපතකින් සිදුවන කාර්යය එතුමිය මඟින් සිදුවූ බව මින් අදහස් කෙරේ. එනම් ඕතොමෝ ක්‍රිස්තුස් වහන්සේ තමන් තුළින් පරාවර්තනය කළ බව, පිළිබිඹු කළ බව මින් ප්‍රකාශ වේ.
සිංහල ප්‍රාර්ථනාවේ ලතින් Iustitiae සඳහා ධර්මනීති යන යෙදුම යොදා ඇත. එයින් යුක්තිය, සාධාරණත්වය ආදිය හැඟවේ. මෙහිදී ධර්මනීතිය, යුක්තිය , සාධාරණත්වය යනාදී යෙදුම් තුළින් වක්‍රව මතු කරන්නේ ජේසුස් ක්‍රිස්තුස් වහන්සේවමය. උන්වහන්සේ හැ‍ඟවීම සඳහා සාධාරණත්වයේ සූර්යයාණන් යන යෙදුම භාවිතා වේ. දේවමාතාවන්ගේ නිර්දෝෂ පිළිසිඳීම අරබයා පිදෙන මංගල්‍යය පූජාවේ එක් යැදුමක "අහෝ මරියාවෙනි ඔබෙන් අපගේ ධර්ම සූර්යයාණන් (සාධාරණත්වයේ සූර්යයා) බිහිවිය යනුවෙන් සඳහන් වේ" (O Mary from you arose the sun of justice, Christ our God)
මේ අනුව මරියාවෝ ධර්මනීති දර්පනය හෙවත් සාධාරණත්වයේ කැඩපත යනුවෙන් නම් කිරීම මඟින් අදහස් කෙරෙනුයේ ඕතොමෝ ජේසුස් ක්‍රිස්තුස් වහන්සේව පිළිබිඹු කරන බවය. ක්‍රිස්තුස් වහන්සේ පමණක් නොව දෙවියන් වහන්සේ ද සාධාරණත්වය වන සේක යන අදහස ගම්‍ය වන ප්‍රකාශ ඇත. එසේම එය මූලික ධර්මගුණයන්ගෙන්ද එකක් සේ සැලකේ.
"ඇය සදා ආලෝකයේ ප්‍රතිබිම්බය ය.
ක්‍රියාශීලී දේව බලයේ අකලංක කැඩපත ය.
එතුමාණන්ගේ යහපත්කමේ ස්වරූපය ය."
( සලමොන්ගේ ප්‍රඥාව 7:26)
පරමඥාන ආසනෙනි
දේවමාතා ප්‍රාර්ථනාවේ හමුවන තවත් සුවිශේෂී විරුදාවලියක් වන්නේ පරමඥාන ආසනෙනි යන්නයි. මෙම සිංහල දෙවදන සැකසී ඇත්තේ ලතින් ප්‍රාර්ථනාවේ එන "Sedes Sapientiae" ඇසුරිනි. එය ඉංග්‍රීසි බසින් Seat of Wisdom ලෙස නම් කර ඇත.
දෙව්මවුන් ආසනයක් ලෙස හඳුන්වා ඇත්තේ මන්ද ? ආසනය යන්නෙන් හුදු පුටුවක් පමණක් අදහස් නොකෙරේ. එය යමක් දරා සිටීමට යොදාගැනෙන්නක්ද වේ. ඕතොමෝ දරා සිටින්නේ ජේසුස් ක්‍රිස්තුස් වහන්සේවය. මේ නාමය නියෝජනය කරන ප්‍රතිමා හා සිතුවම් වල දක්නට ලැබෙන්නේ පුටුවක හිඳගෙන තම උකුල හෝ දෙදණ මත ජේසු බිළිඳා රඳවාගෙන සිටින දෙව්මවුන් ය.
ජේසුස් වහන්සේ යනු මාංශගත වූ ප්‍රඥාවය. මේ අදහස එන්නේ පැරණි ගිවිසුමේ ප්‍රඥා සාහිත්‍යයෙනි. එම ග්‍රන්ථවල ප්‍රඥාව වනාහි හුදු සංකල්පයක් නොව දිව්‍යමය පුද්ගලයෙකි.ඒ අනුව ප්‍රඥාව යනු ක්‍රිස්තුස් වහන්සේ වෙනුවෙන් යෙදුණු බයිබලීය නාමයකි. ජෝන් හෙන්රි නිව්මන් තුමා ක්‍රිස්තුස් වහන්සේව හඳුන්වන්නේ දෙවිඳුන්ගේ පරමඥානය ලෙසිනි. එම "ප්‍රඥාව" පළමුව මරියාවන් තුළත් අනතුරුව එතුමිය උකුල මතත් වැඩුණු නියාව නිව්මන් තුමා විස්තර කරයි. මේ අනුව මරියෝත්තමාවෝ එම ප්‍රඥාවේ ආධාරකය හෙවත් ආසනය බවට පත්වේ.
පැරණි ගිවිසුම තුළ සැඟව පවතින යම් යම් ඉගැන්වීම් නව ගිවිසුමේදී පැහැදිලිව මතු කෙරේ. "ක්‍රිස්තුස් වහන්සේ දෙවියන් වහන්සේගේ බලය හා ප්‍රඥාව වේ" යැයි ශු. පාවුලු තුමා කොරින්තිවරුන්ට යැවූ හසුනේ 1/24 හි පැහැදිලිව පවසයි. මේ සියල්ල මඟින් තහවුරු වන දේ නම් දේවමාතාවෝ ජේසුස් වහන්සේව දරාගෙන සිටි මෑණියන් බවය. එතුමිය තුළ විද්‍යාමාන වූ පූර්ණත්වයෙන්ම නොවූවත් දිව්‍ය සත්ප්‍රසාද වහන්සේ ලබා ක්‍රිස්තුස් වහන්සේව අප තුළ දරාගෙන යන කල්හී අපිදු මේ නාමයට පංගුකාර වන බවද අමතක නොකළ යුතුය.
දෙව්මවුන් පරමඥාන ආසනය ලෙස හැඳින්වීම සියවස් ගණනාවකට උරුමකම් කියන්නකි. 12 වන සියවස තරම් ඈත අතීතයේ නිර්මාණය වූ ප්‍රතිමා මේ බව සනාථ කරයි. ඒ සියළුම ප්‍රතිමාවන්ට ආවේණික ලක්ෂණයක් වනුයේ මරියතුමී පුටුවක හිඳ ජේසු බිළිඳුන් තම උකුලේ දරාගෙන සිටීමය. එවැනි ඉපැරැණි ප්‍රතිමා ඉතාලියේ ආසන දෙව්මැදුරකත්, ප්‍රංශයේ ලූවර් කෞතුකාගාරයේත් දැකිය හැක.
මෙරට යාපනයේ සිල්ලාලෙයි ග්‍රාමයේ ඇති දේවස්ථානයේ මෙවැනි ඓතිහාසික ප්‍රතිමාවක් දැකිය හැක. එය කදිරයි මාතා යන දමිළ නාමයෙන් හැඳින්වේ. පේරාදෙණිය සරසවිය තුළ පිහිටි දෙව්මැදුර ද කැපකර ඇත්තේ මේ නාමයටය. ගරු ඉග්නේෂස් පින්තු පියතුමා එම විශ්ව විද්‍යාලයේ උපාධ්‍යය පියතුමා ලෙස සිටියදි ඉදි කෙරුණු මේ දේවස්ථානය දේශීය ගෘහ නිර්මාණ ලක්ෂණ සහිතව ඉදිකරනු ලැබ 1955 දී ආසිරි ගැන්වුණු අතර ඒ තුළ පෙරදිග පෙනුම ගන්නාවූ පරමඥාන ආසනය නම් විසල් මොසැයික් බිතුසිතුවමක් ගෝව ජාතික කලාකරුවෙක් වූ ඒ. ට්‍රිනිඩැඩ් විසින් කර ඇත.
මේ දේවමාතා විරුදාවලිය බොහෝවිට උසස් අධ්‍යාපන ආයතන හා බැඳී පවතින්නකි. එය අප රටේ පේරාදෙණිය සරසවිය ඇසුරින් ද පිළිබිඹු වේ. මේ නාමය අරබයා මංගල්‍යයක් ජුනි 08 දා සමරනු ලැබේ.
පරමඥාන ආසනෙනි, අප නිසා යාච්ඤා කළ මැනව
අපේ ආනන්ද කාරණාවෙනි
දේවමාතා ප්‍රාර්ථනාවේ හමුවන තවත් සොඳුරු යැදුමක් වනුයේ අපේ ආනන්ද කාරණාවෙනී යන්නයි. දේවමාතාවන් වහන්සේ අපගේ ප්‍රීතියට හේතුව බව ඉන් පැවසේ. ඕතොමෝ අපගේ ආනන්දයට මාර්ගය උදාකළ, ඊට තුඩුදුන් කරුණ බව ඉන් හැඟවේ.
මේ යැදුම සිංහල බසට පෙරළෙන්නේ ලතින් Causa Nostrae Latitiae යන යැදුම ඇසුරිනි. ලැටීශියා යන්න සතුට, ප්‍රීතිය, ආනන්දා යන අරුත ගනී. ජේසුස් ක්‍රිස්තුස් වහන්සේ සකල විශ්වයේ මෙන්ම සෑම ආත්මයකම ප්‍රීතිය වේ. එම ප්‍රීතිය මෙලොවට උදාවූයේ මරියාවන් තුළිනි. එමනිසා එතුමිය එම ප්‍රීතියේ, ආනන්දයේ මූල හේතුව හෙවත් හේතු කාරණාව වේ. එතුමිය දෙවිඳුන්ට අවනතව දුන් එකඟතාව මේ ආනන්දයට හේතුව විය.
එතුමියගේ ආචාර බස එලිසබෙත් තුමියගේ කුසේ උන් බිළිඳු ස්නාවක ජොහාන්ගේ ආනන්දයට කාරණාව විය (ලූක් 1:44) එතුමියගේ මැදිහත්වීම කානා නුවර විවාහයේ සිදුවීමට සම්බන්ධ හැමගේ ආනන්දයට කාරණාව විය. (ජොහාන් 2:1-12) අපේ ආදිමව වූ ඒව ගේ අකීකරු කමින් උදාවූ දුක, ප්‍රීතියට පරිවර්තනය වූයේ මේ නව ඒවගේ කීකරුකම මඟිනි.
"මාගේ ආත්මය මා මිදුම්කාර දෙවිඳුන් ගැන උදන් අනයි" (ලූක් 1:47) යනුවෙන් එතුමිය අත්දුටු ඒ ආනන්දය ශුභාරංචිය මඟින් අපට ප්‍රකාශ කෙරේ.
මේ සමඟ ඇති කළුසුදු පින්තූරය එතුමිය අපගේ ආනන්දයට කාරණාව යන ප්‍රකාශය සඳහා බයිබලීය පසුබිමක් තනයි. එහි දෙව්මවුන් ඉදිරිපත් කෙරෙන්නේ ගර්භනී ස්වරූපයකිනි. පහළින් එලිසබෙත් තුමිය බැහැදැකීමට යාමේ සිද්ධියත්, ඉහළ දෙපසින් ආනන්දයෙන් ඉපිළී දෙවිඳුන්ට පැසසුම් කළ එස්තර් හා ජුදිත් යන පැරණි ගිවිසුමේ කාන්තා චරිත දෙකද දක්වා ඇත.
මා මව්නි අති ප්‍රේමණීය මේ ලෝකේ මගෙ ආධාර
ශෝකේ මා නිති සන්තෝෂය යාච්ඤාවේ මව සුන්දර
අපේ ආනන්ද කාරණාවෙනි අප නිසා යාච්ඤා කළ මැනව.
ඥාන පාත්‍රෙනි
අග්‍රාචාර යුක්තවූ පාත්‍රෙනි
අනර්ඝවූ භක්ති පාත්‍රෙනි
දේවමාතා ප්‍රාර්ථනාවේ දේවමාතාවන් වහන්සේ පාත්‍රයක් නොහොත් බඳුනක් ලෙස හඳුන්වන යැදුම් තුනකි. මේ යෙදුම් ත්‍රිත්වය එන්නේ ලතින් බසින් Vas හෙවත් ඉංග්‍රීසියෙන් Vessel යන වදන හා සමඟිනි. මෙහිදී අපි ඕතොමන් දෙස බලනුයේ දෙවිඳුන් එසේත් නොමැති නම් දෙව්පුතුන් දරා සිටි බඳුනක් ලෙසිනි.
5 වන සියවසේ විසූ ශු. ජෝන් ක්‍රිසොස්තම් සභාපියතුමා මරියතුමියව හඳුන්වන්නේ දෙවි සමිඳුන් තමන් වහන්සේගේ දිව්‍යමය ජීවිතය නම් අගනා මිදිරස දැමූ අලංකාර පළිඟු කුසලානක් ලෙසිනි. 2003 දී ශු. දෙවන ජුවාම් පාවුලු පාප්තුමා ගැළවීමේ ඉතිහාසය තුළ එතුමියගේ අසමසම භූමිකාව විස්තර කරන්නේ එතුමිය දිව්‍ය සත්ප්‍රසාද නිවහනක් ලෙස අරුත්ගන්වමිනි. මාංශගත වූ දෙවිඳුන් කුසේ දරාගෙන එලිසබෙත් තුමිය බැහැදැකීමට ගිය අවස්ථාව හා සසඳමින් ඕතොමෝ දිව්‍ය සත්ප්‍රසාද නිවහනක් ලෙස මෙහිදී එතුමා ඉදිරිපත් කරයි.
මෙම ලතින් වදන ග්‍රීක බසේ Skeuos යන වදන හා සමානකම් පෙන්වයි. ඉන් භාජනයක් යන අදහසට අතිරේකව උපකරණයක් හෝ යමක් කිරීමට යොදාගන්නා ආයුධයක් යන අදහසක් ද කියැවේ.
මේ අනුව ගත්කල මරියෝත්තමාවෝ ශුද්ධාත්මයාණන් වහන්සේගේ උපකරණයක් හා උන්වහන්සේ වැඩ සිටින වාසස්ථානයක් යන අදහසද ගම්‍ය වේ.
මෙහි පළමු යැදුම Vas Spirituale වන අතර ඉන් ඕතොමෝ පියවි දෙනෙතට අදෘශ්‍යමාන ආත්මිකවූ යමක් දරා සිටින ආත්මික බඳුනක් බව පැවසේ. කෙසේවෙතත් මේ සඳහා සිංහල ප්‍රාර්ථනාවේ යෙදෙන්නේ ඥාන පාත්‍රෙනි යන වදනයි. එහි දිව්‍ය ඥානය වනාහි කිතු සමිඳුන් වෙනුවෙන් යෙදෙන පර්යාය පදයක් ලෙස ගත හැක.
Vas Honorabile යනුවෙන් යෙදෙන දෙවැන්න සඳහා ඇත්තේ අග්‍රාචාර යුක්තවූ පාත්‍රෙනි යන්නයි. එහිදී ජෝන් හෙන්රි නිව්මන් තුමා ප්‍රකාශ කරන්නේ මරියතුමී දේවපුත්‍රයා දරාගෙන සිටි බැවින් ගෞරව බහුමානීය චරිතයක් වනවා පමණක් නොව දුක්ප්‍රාප්තිය ද තමන් තුළ දරාගත් බැවින් ආත්මීයව ප්‍රාණපරිත්‍යාගීත්වයටද උරුමකම් කියන බවයි. වික්ෂෝප මෑණියන්ගේ මංගල්‍යය අරබයා ගැයෙන සුපුවත් ජයනදේ මරිය තුමිය කුරුසය පාමුල රැඳෙමින් දිවි නොපිදුවද ප්‍රාණපරිත්‍යාගීත්වයට හවුල්වන බව සඳහන් වේ.
Vas Insigne Devotionis යන්න සිංහල ප්‍රාර්ථනාවේ ඇත්තේ අනර්ඝවූ භක්ති පාත්‍රේනි කියාය. දෙවි සමිඳුන් කෙරෙහි එතුමිය සතුවූ භක්තිය සෙසු සියළු සාන්තුවරයින් පරයා යන්නකි. ඕතොමෝ පළමු දේව පනතට කොතෙක් විශ්වාසනීය වූයේද යන්න මෙහිදී අවධානයට ලක්වේ. එතුමිය තුළින් ප්‍රකාශ වූයේ හුදු භක්ති අභ්‍යාස නොව ඉන් ඔබ්බට ගිය දේව සේවාව සඳහා පූර්ණව කැපවීමකි.
මරියතුමී සියල්ල තම සිතේ නිධන් කරගත් බව ලූක් සුබාරංචිය ප්‍රකාශ කරයි. ඒ අනුවද එතුමිය පාත්‍රයක් යන අදහස හඳුනා ගත හැක.
එතුමියගේ මැදිහත්කම මත අපටත් ශුද්ධාත්මයාණන් දරා සිටින බඳුන් වන්නට අවැසි වරම් දෙවිඳුන්ගෙන් ඉල්ලමු. " එහෙයින් යමෙක් නපුරු දේ අත්හැර තමාම පවිත්‍ර කරගනී නම් ඔහු පිරිසිදු කරන ලද සමිඳාණන් වහන්සේගේ භාවිතයට සුදුසු වටිනා දෙයකට යෙදෙන ඕනෑම යහපත් සේවයකට යෝග්‍ය භාජනයක් වන්නේය." (2 තිමති 2:21)
දිව්‍ය අභිරස් විෂයක පද්මයෙනි
මේ මනරම් යැදුම වෙසෙස් බවකින් යුක්තය. මන්ද එහිදී මරියෝත්තමාවෝ සුගන්ධවත් කුසුමකට සමකොට ඉදිරිපත් කෙරෙන බැවිනි. ලතින් ROSA MYSTICA යන අයැදුම (මෙය ඉංග්‍රීසි බසින් Mystical Rose) තුළ උද්දීපනය කෙරෙනුයේ රෝස හෙවත් සෙව්වන්දි මලකි.
එහෙත් සිංහල පරිවර්තනය මුළුමනින්ම ශ්‍රී ලාංකික ස්වරූපයක් ගන්නකි. මන්ද මෙය නිර්මාණය වී ඇත්තේ ලතින් බසින් රෝස මල ලෙස යෙදෙන්න වෙනුවට අපේ පොළොවට හුරුපුරුදු අපේ ජලයේ වැඩෙන නෙලුම් මලක් ආදේශ කරමිනි. ඒ අනුව රෝස වෙනුවට අපි දකින්නේ පද්මයකි.
දිව්‍ය අභිරහස් යනු පෘතග්ජන මනසට පූර්ණ වශයෙන් ග්‍රහණය කරගත නොහැකි දිව්‍යමය සත්‍යතාවන් ය. එවන් අභිරහස් අප කරා වහනය කරන, එකී දිව්‍ය අභිරහස් වල සුගන්ධය අප වෙත වහනය කරන කුසුම වනුයේ මරියෝත්තමාවෝ ය.
පැරණි ගිවිසුමේ තැන් කීපයකම රෝස හෙවත් සෙව්වන්දි කුසුම ගැන සඳහන් වේ.
"මම ෂාරොන්හී සෙව්වන්දියක් ය " ( ප්‍රේම ගී 2/1) කාන්තාරය සෙව්වන්දි මෙන් මල් දරන බව යෙසායා පවසන අතර උපදේශකයා හෙවත් සිරාක් ද සෙව්වන්දි ගැන ප්‍රකාශ කරයි. ගරු මර්සලින් ජයකොඩි පියතුමා මේ අදහස ඉතා අලංකාරව ගීතිකාවල ඉදිරිපත් කොට ඇත.
සපිරි සෑම අසිරි සෝම...... ෂරොන්හි රෝස කුසුමෙනි......
මල් ලොව රැජින ලෙස සැලකෙන්නේ ද රෝස මලය. එමනිසා ජයකොඩි පියතුමා දෙව්මවුන්ට "මල් ලොව රැජිණිය ඔබ බව පවසයි" යනුවෙන් පැණිබර වනමල් ගීතිකාවේ පබඳා ඇත. එසේම නෙළුම් පිපිලා ගීතිකාවේ මරියාවන් ඉදිරිපත් කර ඇත්තේ "සෑම සුවඳැති මල් වනයේ පිපි ලස්සන කුසුමියෙනි" යනුවෙනි.
රෝස මල, මල් ලොව රැජින වන්නේ යම් සේද මරියෝත්තමාවෝ සාන්තුවරයින් අතර රාජිනිය වන්නීය. ශු. බ්‍රිජ්ඩ් මුනිවරිය ලියන්නෙ රෝස මල සුවඳ විහිදුවන්නා සේම, අපේ දසුනට ප්‍රියංකර, අපගේ ස්පර්ශයට මෘදුව දැනෙන, එහෙත් කටු අතර වැඩෙන්නක් ලෙසිනි. එවන් ගුණදම් දරන්නෝ මරිය තුමිය මුහුණ දුන් සේම දුක් කම්කටොලු යන කටු වලින් වටව සිටිති. අලගියේරි දාන්තේ කිවියා මරියාවන් හඳුන්වන්නේ දේව වචනය මාංශගතවූ රෝස කුසුම ලෙසිනි.
රෝස වෙනුවට හෙළ රචකයා යොදා ගත් පද්මය වෙත අපේ අවධානය දෙමු. නෙළුම් මල අපේ දේශීය සංස්කෘතිය තුළ පූජනීයත්වය සංකේතවත් කරන මලකි. ආගමික සංකල්ප හා බැඳුණු මලකි. දේවරූප වැඩ සිටින්නේ නෙලුම් මලක් මෙන් වූ පද්මාසන මතය. එය අයහපත අතරින් යහපත මතුකර පෙන්වන ස්වරූපය ඉදිරිපත් කරන මලකි. නටුවේ කටු ඇති රෝස මල මෙන්ම නෙළුමේ දණ්ඩද කටු ගතිය සහිත එකකි. සුභාෂිතය ලියූ අලගියවන්නයන් මිනිසා සතු හොඳ නරක ගැන ලියද්දි නෙළුම උදාහරණයට ගන්නේ "වෙසෙස් සිනිඳු මුවරඳබර සහස්පත කොරොස් නලින් යුතුවෙයි කටුපෙලිනි යුත" කියාය. මේ අනුව හෙළ ලකුණ සහිතව දේවමාතා ප්‍රාර්ථනාව පද්මය මනාව ගලපා ඇත. කෙසේවෙතත් දමිළ බසින් නම් එය " රෝජා මලරේ" ලෙස රෝස මලම යොදමිනි.
1531 දී සිදුවූ දෙව්මවුන්ගේ ගුවාඩුලුපේ දර්ශනයයේ දී එතුමිය ශු. ජුවාන් දියාගෝ තුමන් හරහා සිදුකළ රෝස මල් ප්‍රාතිහාර්ය ගැන අප අසා ඇත. මේ නමින් දෙව්මවුන් කෙරෙහි සුවිශේෂී භක්තියක් ගොඩනැඟුණේ මෑත කාලීනව 1940 ගණන්වල ඉතාලියේ බ්‍රෙශියා හී පියරිනා ගිල්ලි නම් තැනැත්තියට රෝස මල් තුනක් සහිතව දෙව්මවුන් දර්ශනය වූ සිදුවීම සමඟිනි. රෝස කුසුමේ මෑණියෝ යනුවෙන් අද වනවිට එතුමිය අප අතර ඉතා පසිඳුය. ඒ නමට කැපකළ දේවස්ථාන කීපයක් හලාවත කටුනේරියේ තිසේරාපුරයේද, මයික්කුලමෙ ද , බදුල්ලේ මීදුම්පිටිය ප්‍රදේශයේ ද, වවුනියාවේ ද පිහිටා ඇත.
දිව්‍ය අභිරහස් විෂයක පද්මයෙනි, අප නිසා යාච්ඤා කළ මැනව.
දාවිත් රාජේන්ද්‍ර කීලෙනි
TURRIS DAVIDICA යන ලතින් අයැදුම වෙනුවෙන් සිංහල ප්‍රාර්ථනාවේ දැකිය හැක්කේ දාවිත් රාජේන්ද්‍ර කීලෙනි යන යෙදුමය. Turris යන්නෙන් කුලුනක් හෝ කණුවක් නැත්නම් නගරයක ආරක්ෂාව වෙනුවෙන් ගොඩනැංවූ බලකොටුවක් අදහස් කෙරේ. ඒ අනුව ලතින් පදය ඔස්සේ ඒ වෙනුවෙන් නිර්මිත ඉංග්‍රීසි පාඨයේ දැක්වෙන "Tower of David" යන්න පහසුවෙන් තේරුම් ගත හැක.
ජෙරුසෙලම් නගරය වටකොට ඉදිවූ කොටුපවුරේ එක් අන්තයක පිහිටා තිබූ අවි ආයුධ වලින් සන්නද්ධ උස් කුලුනක් සඳහා දාවිත්ගේ කුලුන යන නාමය භාවිතා වී ඇත. ඒ අදහස අනුව යමින් සිංහල පරිවර්තනයයේ ගෙන ඇත්තේ ඉන්ද්‍රඛීලය / ඉන්ද්‍රකීලය යන යෙදුම බව ෆිලීෂන් අබයකෝන් වියතා පවසයි. ඉන්ද්‍රඛීලය යන්නේ මුල් අදහසක් ලෙස ඉන්ද්‍ර හෙවත් ශිවගේ නන්දි ගවයා බැඳ තබන සවිමත් ඉන්න (කනුව) සැලකුවද එය පසුකාලීනව නගරයක වාසල් දොරටුවේ සවිකරන ලද සවිමත් කණුවක් නැත්නම් පිරිත් මණ්ඩපයේ මැද කුලුන සඳහා භාවිතා වන වචනයක් ලෙස වැඩිදියුණු වී ඇත.
ඒ අනුව මෙය දාවිත් රජ + ඉන්ද්‍රඛීලය යන යෙදුම් එකතු වී තැනුණක් බව අබයකෝන් වියතා පවසයි. (රජ.+ ඉන්ද්‍ර = රාජේන්ද්‍ර ) ඒ අනුව කීලය යන වදන වෙන්ව යෙදී ඇත. කෙසේවෙතත් නුවරක වාසල් දොරටුවේ සවිකළ ශක්තිමත් කණුව යන අදහස මෙහි මුඛ්‍යාර්ථය ලෙස ගත හැක.
මරියෝත්තමාවෝ කුලුනකට සම කොට ඇත්තේ මන්ද ?
නගරයක වාසල් දොරටුවේ ඇති කුලුනක් යනු එක් අතකින් නගරයට අභිමානයක් මෙන්ම අලංකාරයක් ගෙන දෙන්නක් වන අතර අනෙක් අතින් එය ආරක්ෂාවේ සංකේතයකි. මෙයින් දෙව්මවුන්ගේ අධ්‍යාත්මික සුන්දරත්වයත්, ඕතොමෝ සවිමත් බලකොටුවක් මෙන් ජේසු බිළිඳුන් කුස පිළිසිඳගැනීමේ සිට වැඩෙන තුරු උන්වහන්සේ වටකොට ලබාදුන් ආරක්ෂාවත් සංකේතාත්මකව පිළිබිඹු කෙරේ. දෙව්සමිඳාණෝ තම පුතුගේ රැකවරණය වෙනුවෙන් නිර්මාණය කළ අනර්ඝවූ බලකොටුව වන්නේ මරියෝත්තමාවෝ ය.
මෙහි වචනාර්ථය ගන්නා දාවිත්ගේ කුලුන ගැන පැරණි ගිවිසුමේ අපට හමුවේ.
"ඔබේ ගෙල බලවතුන්ගේ පලිස් දහසක් එල්ලා තිබෙන ආයුධ තැබීමට ගොඩනැඟුවාවූ දාවිත් රජුගේ කොත මෙන් ය." (ප්‍රේම ගී 4/4) මෙයින් සනාථ වනුයේ දාවිත්ගේ කුලුන අවි ආයුධ වලින් සන්නද්ධ කෙරුණු ස්ථානයක් බවයි. ආරක්ෂාව පතා දිව යා හැකි තැනක් බවයි. ආපදාවකදී කෙම්බිමක් බවයි. ඒ අනුව මරියෝත්තමාවන් අපගේ ආත්මික සතුරා සමඟ කරන සටනේදී මැදිහත් වෙමින් අපට රැකවරණය සලසන්නියයි. නිරා සතුරා අපට එරෙහිව උපා යොදන කල අප පිළිසරණ පතා දිව යායුතු රක්ෂස්ථානය එතුමිය වේ.
Virgo potens, sicut Turris David, mille clypei pendent ex ea, omnis armatura fortium.
(It is the mighty Virgin, like the Tower of David; a thousand bucklers hang upon it, all the armor of valiant men.)
දවිඳු රජුගෙ කුලුන බඳුව සවිබල ඇති කන්‍යාව යනුවෙන් දෙව්මවුන් වෙනුවෙන් ගැයෙන ගීතිකාවක ඇත.
දාවිත් රාජේන්ද්‍ර කීලෙනි, අප නිසා යාච්ඤා කළ මැනව.
දන්තමය ගෝපුරෙනි
දේවමාතා ප්‍රාර්ථනාවේ හමුවන තවත් අමුතුම ආරේ අයැදුමක් වනුයේ දන්තමය ගෝපුරෙනි යන්නයි. එය ලතින් ප්‍රාර්ථනාවේ "TURRIS EBURNEA" යන වැකිය සඳහා දී ඇති සිංහල පරිවර්තනයයි.
Turris යනු කුලුන හෙවත් ස්ථම්භය යන අරුත දෙන පදයයි. දේවමාතා ප්‍රාර්ථනාවේ දෙව්මවුන් අරබයා Turris හෙවත් කුලුන යන අදහස දනවන අයැදුම් දෙකෙන් එකක් වන්නේ මෙයයි. නමුත් සිංහල පරිවර්තකයා එම අවස්ථා දෙකේදී යොදාගෙන ඇත්තේ සිංහල පද දෙකකි. මුල් යැදුමේ Turris වෙනුවෙන් කීලය යන්න යෙදූ හේ දෙවැන්න සඳහා යොදා ඇත්තේ ගෝපුර යන්නයි. (ඉංග්‍රීසියෙන් ද මේ දෙකටම යෙදෙනුයේ Tower යන එකම පදයයි.
ගෝපුර යන පදය අනන්‍ය වන්නේ හින්දු කෝවිල් හා සමඟිනි. කෝවිල මතින් ඉහළට එසවී පවතින ත්‍රිකෝණාකාර ස්වරූපයක් ගන්නා ඉතා උස් ගෘහ නිර්මාණ අංගය ගෝපුරයි (කෝපුරම්/ ගෝපුරම්) එය ඉතා උස් කුලුනක ස්වභාවය ගනි.
Eburnea යනු ඇත්දළ වේ. දන්තමය යන වදනින් හැඟවෙන්නේ ඇත් දළින් කරන ලද යන අරුතයි. ඇත්දළ වනාහි ධවලමය, ශක්තිමත් එමෙන්ම ඉතා ශෝභමාන ද්‍රව්‍යයකි. දෙව්මවුන් සඳහා මේ විරුදාවලිය ලැබෙන්නේ පැරණි ගිවිසුමේ ප්‍රේම ගී 7/4 හී ඇති "ඔබේ ගෙල ඇත්දත් කුළුණක් වැනිය....." යන පාඨයේ ආභාසයෙන් යැයි කියැවේ.
ඇත්දත් මඟින් සංකේතවත් කෙරෙන්නේ මරියෝත්තමාවන් සතුවූ උදාර පිවිතුරුභාවය, ශෝභමානබව සහ ශක්තියයි. මේ ගති ලක්ෂණ ඇත්දළ වල දැකිය හැක. මේ අයැදුම මඟින් දෙව්මවුන් සෙස්සන් විශේෂයෙන්ම අනෙක් ශ්‍රාවකයන් අතර කැපී පෙනෙන චරිතය බව ව්‍යංගයෙන් පැවසේ. සෙසු ශ්‍රාවකයෝ පළාගිය පසුබිමක මරියාවෝ කුරුස පාමුල රැඳී සිරියාය. සෙසු ගොඩනැගිලි අතර කුළුණක් නොහොත් ගෝපුරක් පැහැදිලිව කැපී පෙනෙන සේ එතුමිය ද අන්‍යයන් අතර කැපී පෙනේ. සලමොන් රජුට පවා තිබුණේ ඇත්දළින් කළ සිංහාසනයක් පමණි. ( 1 රාජාවලිය 10:18) නමුත් මරියාවෝ මිහිපිට රජුන්ට වඩා ශ්‍රේෂ්ඨ වන නිසා ඕතොමෝ දන්තමය කුලුනකි.
ප්‍රේම ගී වල හමුවන ඇත්දළ කුළුණක් බඳුවූ ගෙල ගැන පාඨය පිළිබඳව ශු. බර්නඩින් තුමා පවසන්නේ ඒ ගෙල නම් දේවමාතාවන් වහන්සේ බවයි. සාන්ත සභාවේ හිස වන ක්‍රිස්තුස් වහන්සේ හා එහි අවයව එකිනෙක සම්බන්ධ කරන්නේ ගෙල මඟිනි. ඒ අනුව මරියතුමී වනාහි ක්‍රිස්තුස් වහන්සේ හා දේව ජනතාව සම්බන්ධ කරන්නියයි.
දන්තමය ගෝපුරෙනි අප නිසා යාච්ඤා කළ මැනව.
ස්වර්ණමය මන්දිරෙනි
දේවමාතා ප්‍රාර්ථනාවේ හමුවන තවත් අයැදුමක් වන ස්වර්ණමය මන්දිරෙනි යන්න බිඳී එන්නේ "DOMUS AUREA" යන ලතින් යැදුමෙනි. Domus යන්නෙන් නිවස යන අරුතත්, Aurea යන්නෙන් රත්තරන් යන අදහසත් හැඟවේ. ඒ අනුව මෙහි අරුත වන්නේ රනින් කළ නිවහන යන්නයි. මීට ඉංග්‍රීසි බසින් House of Gold ලෙස යෙදේ.
Domus යන්නෙන් සරලවම නිවස යන්න හැඟවුණද සිංහල යාච්ඤා රචකයා ඊට යොදා ඇත්තේ මන්දිරය යන වදනයි. ඒ එහි අගය වැඩිකිරීමට විය හැක. ඒ අනුව මෙහිදී මරියෝත්තමාවන් රත්තරනින් නිමවූ මැඳුරක් බව පැවසේ.
මෙයින් මාංශගත වූ දේවපුත්‍රයා වැඩුණු දෙව්මවුන්ගේ ගර්භය අදහස් කෙරෙන බව පිළිගැනේ. එසේම අතීතයේ ජෙරුසෙලමේ දේව මාලිගය සඳහා රන් නිවහන යන අරුතැතිව මේ නාමය භාවිතා වී ඇත. මන්ද පැරණි ගිවිසුමට අනුව දේව මාලිගය රනින් වසා තිබූ අයුරු අපට දැකිය හැක. "මුළු මාලිගාව සම්පූර්ණයෙන් නිම වන තෙක් රන් ගැල්වීය. දිව්‍ය වාක්‍යස්ථානය තුළ වූ පූජාසනයෙහි ද සම්පූර්ණයෙන්ම රන් ආලේප කෙළේය." (1 රාජාවලිය 6:22)
මේ අනුව පැරණි ගිවිසුමේ දෙවිඳුන්ගේ වැඩ විසුම සංකේතවත් කළ දේව මාලිගය යම් සේද නව ගිවිසුමේ දෙවිඳුන් සිය ජනතාව සමඟ වැඩ විසුම මාංශගතවූ දේව පුත්‍රයාගේ වැඩ සිටීමෙන් හැඟවිණි. ඒ අනුව පැරණි ගිවිසුමේ දේව මාලිගාවේ භූමිකාව නව ගිවිසුමේ දී ක්‍රියාත්මක වූයේ මරියෝත්තමාවන් මඟිනි. ඒ අනුව ඕතොමෝ ස්වර්ණමය මන්දිරය වේ. මන්ද "සමිඳාණන් වහන්සේගේ තේජසින් දෙවියන් වහන්සේගේ මාලිගය පිරී ගිය" (2 වංශාවලිය 5:14) ලෙස ශුද්ධාත්මයාණන්ගෙන් දෙව්මවුන් පිරී ඉතිරිණි. (ලූක් 1:35)
වෙනත් ලෙසකින් කියතොත් මරියෝත්තමාවෝ ජේසුස් වහන්සේගේ නිවහන වූහ. මාංශගතවූ දේව වචනය වැඩ සිටි දේව මාලිගය විය. මන්ද "ප්‍රඥාව ඇගේ මන්දිරය ඉදි කර ඇත." (හිතෝප්දේශය 9:1 ) කියා ශුද්ධ ලියවිල්ල පවසයි. බයිබලීය දැක්මට අනුව ප්‍රඥාව වනාහි ජේසුස් වහන්සේ වෙනුවෙන් යෙදෙන පර්යාය පදයකි. ශු. තෝමස් ඇක්වයිනස් තුමා මේ ගැන පවසන්නේ දේව මාලිගයේ සියල්ල රනින් වැසී පැවති සේ මරියාවන්ගේ ආත්මය ශුද්ධවන්ත බවින් පිරී තිබූ බවයි. එම යුගයටම සමකාලීන වූ ශු. මහ ඇල්බට් තුමා දෙව්මවුන් හඳුන්වන්නේ රනින් කළ දේව මාලිගය ලෙසිනි.
රන් වනාහි අතිශයින් අලංකාරවූද , මිලෙන් අධික වූද, කල්පවත්නා ගුණයෙන් සපිරි ලෝහයකි. ඒ අනුව එහි වටිනා ගුණයන් හා ලක්ෂණ දෙව්මවුන් විෂයෙහිද මනාව ගැලපේ.වෙසෙසින්ම එතුමියගේ ආධ්‍යාත්මික ගුණ සමුදාය විස්තර කිරීමෙහිලා රන් මනාව ගැලපෙන නිදසුනකි.
"ඕපිර්හී රන් අබරණින් සැරසුණු ඔබේ අග රැජින ඔබ සිහසුනේ දකුණු පසින් වැජඹෙන්නීය." (ගීතාවලිය 45:9)
ස්වර්ණමය මන්දිරෙනි අප නිසා යාච්ඤා කළ මැනව.
වාක්ප්‍රසාද ගැබයෙනි
දේවමාතා ප්‍රාර්ථනාවේ හමුවන මීළඟ අයැදුම නම් Foederis Arca යන ලතින් යැදුමේ පරිවර්තනය ලෙස ඉදිරිපත් කර ඇති වාක්ප්‍රසාද ගැබයෙනි යන්නයි. මෙහි Foederis යන්නෙන් ගිවිසුමට අයත් නොහොත් ගිවිසුමේ යන අදහස පිළිබිඹු වන අතර Arca යන වචනයෙන් අගනා යමක් තැන්පත් කිරීමට යොදාගන්නා ශක්තිමත් පෙට්ටියක් අදහස් කෙරේ.
ඒ අනුව වාක්ප්‍රසාද ගැබයෙනි හෙවත් Foederis Arca යන්නෙන් පැරණි ගිවිසුමේ හමුවන ඉශ්‍රායෙල්වරුන්ගේ අතිපූජ්‍ය ආගමික වස්තුව වන ගිවිසුම් කරඬුව අදහස් කෙරේ. ජෙරුසෙලම් දේව මන්දීරය අභ්‍යන්තරයේ අති ශුද්ධස්ථානයේ තැන්පත් කර තිබූ මේ ගිවිසුම් කරඬුව දැවයෙන් නිමවා ඇතුළතත් පිටතත් රන් ආලේප කරනු ලැබූ ඒ මත කෙරුබ්වරුන්ගේ රූප තබනු ලැබූ දෙපසින් ආධාරක සහිතව ඔසවාගෙන යාහැකි මාදිලියේ පෙට්ටියකි. ( නික්මයාම 25:10-22)
ගිවිසුම් කරඬුව තුළ මන්නා දැමූ රන් බඳුනද, ආරොන්ගේ දළු ලෑ සැරයටි ද, ගිවිසුමේ ශිලා ලේඛන ද විය. (හේබ්‍රෙව් 9:4)
මෙලෙස පැරණි ගිවිසුමට අදාළ දෙයක් මරියෝත්තමාවන්ට ගලපන්නේ කෙසේද ? ඕතොමෝ ගිවිසුම් කරඬුවට සම කරන්නේ මන්ද ? මේ සම්බන්ධයෙන් අම්බ්‍රෝස්,එෆ්‍රම්, ජෙරොම්, අතනාසියුස්, සිරිල්, හිපෝලිටස් ආදී පැරණි සභා පියවරු ගණනාවක්ම ඉතා අරුත්බර අර්ථකථනයන් ඉදිරිපත් කර ඇත.
ඒ පිළිබඳ සන්සන්දන මෙලෙස ඉදිරිපත් වී ඇත.
- ගිවිසුම් කරඬුව තුළ වූ ගිවිසුමේ ශිලා ලේඛන හෙවත් දස පණත දේව වචනය සනිටුහන් කරයි. දේවමාතාවන්ගේ ගර්භයේ තිබුණේ මාංශගතවූ ජීවමාන දේව වචනය හෙවත් ජොහාන් සුබාරංචියට අනුව වචනය තෙම යනුවෙන් හැඳින්වෙන ධර්මයාණෝ ය.
- ගිවිසුම් කරඬුව තුළ ස්වර්ගයෙන් ලද ආහාරය හෙවත් මන්නා බොදුන් තැන්පත් කර තිබිණි. දේවමාතාවන්ගේ ගර්භයේ තිබුණේ ස්වර්ගයෙන් පහළ වූ ජීවමාන භෝජනය හෙවත් ක්‍රිස්තුස් වහන්සේගේ ශ්‍රී ශරීරයයි (දිව්‍ය සත්ප්‍රසාද වහන්සේයි)
- ගිවිසුම් කරඩුව තුළ උත්තම පූජකත්වය සංකේතවත් කෙරෙන ආරොන්ගේ සැරයටිය තැන්පත් කර තිබිණි. දේවමාතාවන්ගේ ගර්භයේ වැඩ සිටියේ සදාකාලික උත්තම පූජකයාණෝය.
- දාවිත් රජු දේව වචනය අඩංගු ගිවිසුම් කරඬුව කඳුකරයේ ඕබෙද් ඒදොම් කරා රැගෙන ගිය සේ දේවමාතාවෝ මාංශගතවූ දේව වචනය දරාගෙන ජුදා කඳුකරයට ගියහ. දාවිත් පූජක සැට්ටයකින් සැරසී ගිවිසුම් කරඬුව හමුවේ ඉපිලී නැටූ සේ පූජක පරපුරෙන් ආ ජොහාන් එලිසබෙතුන්ගේ කුසේ සිට මාංශගතවූ දේව වචනය රැගෙන ආ කරඬුව වූ දෙව්මවුන් හමුවේ ඉපිලී ගියේය.
- "සමිඳාණන් වහන්සේගේ ගිවිසුම් කරඬුව මා ළඟට එන්නේ කෙසේද" (2 සාමුවෙල් 6,9) කියා දාවිත් විමසූ ලෙසම එලිසබෙත් තුමී මාගේ සමිඳාණන්ගේ මෑණියන් මාවෙත ඒමට තරම් මා කවරෙක්ද කියා අසයි.
- ගිවිසුම් කරඬුව තෙමසක් ඕබෙද් ඒදොම් හී තැන්පත් කර තැබූ සේ මරියාවෝ ද එලිසබෙතුන්ගේ නිවසේ තෙමසක් නැවතී සිටියහ.
එළිදරව්ව පොතේ 11,19 කියන පරිදි ස්වර්ගයේ දෙවියන් වහන්සේගේ මාලිගාව විවෘත කළ විට දිස්වූයේ ඒ තුළ වන ගිවිසුම් කරඬුවයි. මේ දෙස මරියවේදීය දෘෂ්ටියකින් බලන්නෝ එය අර්ථකථනය කරන්නේ ඕතොමන් ස්වර්ගයේ වැඩසිටීම ලෙසිනි.
සිංහල ප්‍රාර්ථනාවේ ගිවිසුම් කරඬුව යන යෙදුම වෙනුවට වාක්ප්‍රසාද ගැබය යනුවෙන් සඳහන් වීමේ ඇත්තේ එක්තරා ආකාරයක හෙළ ඌරුවකි. ගැබ හෙවත් ගර්භය වනාහි මෙරට ආගමික ස්ථානවල පූජ්‍ය වස්තූන් තැන්පත් කෙරෙන කොටසයි. ඒ අනුව මාංශගතවූ දේව වචනය තැන්පත් කරනු ලැබූ ගැබ වූයේ දෙව්මවුන් ය.
වාක්ප්‍රසාද ගැබයෙනි , අප නිසා යාච්ඤා කළ මැනව.
පරමණ්ඩල වාසලෙනි
මෙම අයැදුම ලතින් බසින් තෙආකාරයකින් දැකිය හැක. එනම්,
- Ianua Caeli
- Janua Caeli
- Porta Caeli
ලතින් "Ianua" යන්නෙන් නුවරකට හෝ පූජ්‍යස්ථානයකට පිවිසෙන ස්ථානයේ හමුවන පියන් දෙකක් සහිත දොර අදහස් කෙරෙන අතර "Janua" යන්න ද්වාරය හෝ දොර අදහස් කරයි. "Porta" යන්නෙන්ද ප්‍රවේශය හෝ ගේට්ටුව යන අදහස ගම්‍ය වේ. ඒ අනුව මේ වදන් ත්‍රිත්වයෙන්ම අදහස් වන්නේ මරියෝත්තමාවෝ ස්වර්ගයේ දොරටුව නොහොත් ප්‍රවේශය වන බවයි. මේ සඳහා ඉංග්‍රීසි බසින් යෙදෙන්නේ Gate of Heaven යන්නයි.
මෙමඟින් මූලිකවම අදහස් දෙකක් ප්‍රකාශ කෙරේ.
- ජේසුස් ක්‍රිස්තුස් වහන්සේ මෙලොවට පිවිසීම සඳහා භාවිතා කළ ප්‍රවේශය නොහොත් දොරටුව මරියෝත්තමාවෝ ය.
"සමිඳාණන් වහන්සේ මට කතා කොට, 'මේ දොරටුව නෑර වසා තිබිය යුතුය. කිසිවෙක් එයින් ඇතුළු නොවන්නේය. මන්ද ඉශ්‍රායෙල්වරුන්ගේ දෙවිසමිඳාණන් වහන්සේ එයින් ඇතුළු වූ සේක. එබැවින් එය වසා තිබිය යුතුය." (එසකියල් 44,2-3) මරියවේදීය දෘෂ්ටියෙන් ඉහත දිවැසිවර වදන් අර්ථකථනය කරද්දී ප්‍රකාශ වන්නේ මෙහි දොරටුව යන්නෙන් දේවමාතාවන්වත් වෙසෙසින්ම එතුමියගේ නිත්‍ය කන්‍යභාවය අදහස් කෙරෙන බවයි. - අපගේ මෙලොව ජීවිතය අවසානයේ ස්වර්ගය වෙත පිවිසීමේ දොරටුව වන්නේ මරියෝත්තමාවෝ ය.
ශු.අම්බ්‍රෝස්, ශු. අගුස්තීනු වැනි පැරණි සභා පියවරුන් මෙන්ම මෑතකාලීනව විසු ලුවි මාරි ද මොන්ෆර්ට් හා ජෝන් හෙන්රි නිව්මන් තුමන්ලා මේ පිළිබඳව ඉගැන්වීම් කර ඇත. ශු. ලුවී මාරි මොන්ෆර්ට් තුමා පවසන්නේ ක්‍රිස්තුස් වහන්සේ වෙත ළඟාවීමේ කෙටිම මඟ මරියෝත්තමාවන් බවයි. ශු. X පියුස් පාප්තුමා පවසන්නේ ජේසුස් වහන්සේ කරා යාමට මරියාවන්ට වඩා ස්ථිර, පහසු වෙනත් මඟක් නොමැති බවයි.
ශු. බොනවෙන්චර් තුමා මෙසේ ප්‍රකාශ කරයි. " මරියෝත්තමාවන් හරහා මිස භාග්‍යවන්ත රාජ්‍යයට ප්‍රවේශ වීමට අන් මඟක් නොමැති හෙයින් ඕතොමන් ස්වර්ගයේ දොරටුව ලෙස හඳුන්වනු ලැබේ."
මේ අනුව ගත් කල මෙය අපගේ භෞතික මරණය හා සම්බන්ධකම් පෙන්වයි. නමෝ මරිය යැදුමේ දෙවන අදියරේදී සාන්ත මරියනී ...... දැනුත් අපේ මරණ වෙලේදිත් අප වෙනුවෙන් යදින ලෙස එතුමියගෙන් ඉල්ලන්නේ එබැවිනි.
මේ සඳහා සිංහල පරිවර්තකයා ඉතා සොඳුරු පද ගැලපුමක් කර පරමණ්ඩල වාසල යන යෙදුම යොදයි. අතීතයේ මාලිගාවකට පිවිසෙන දොරටුව වාසල, වාසල් දොරටුව යනාදී නම් වලින් හැඳින්විණි. ඒ අනුව දොර, ද්වාරය නැතහොත් ගේට්ටුව යැයි නොයොදා වාසල ලෙස එහි යොදා ඇත.
සුප්‍රකට Ave Marisstellla ලතින් ගීතිකාවේ
Ave marisstellla
Dei Mater alma
atque semper Virgo
felix caeli porta
යනුවෙන් ගැයේ.
එහිදී එතුමිය "චේලි පෝර්තා" හෙවත් ස්වර්ගයේ ද්වාරය ලෙස හැඳින්වේ. මොසැසි පෙරේරා මාහිමියෝ මුහුදෙ දුලන තරුව ගීතිකාවේ එය ඉදිරිපත් කරන්නේ "පහන් දොර සගේ" යනුවෙනි.
මෙරටින් විදෙස්ගතව පූජකවරය ලද මහනුවර රජ පෙළපතට අයත් දොන් ජුවාම් නම් රජ කුමරෙක් පෘතුගාලයේ ටෙල්හෙරස් හී තැනූ දේවස්ථානය හා ආරාමය කැපකරන ලද්දේ පරමණ්ඩල වාසල නම් දේවමාතා විරුදාවලියට බව සිරිලක් සසුන් ඉතිහාසය සනාථ කරයි.
පරමණ්ඩල වාසලෙනි, අප නිසා යාච්ඤා කළ මැනව.
උදය තාරකාවෙනි
දේවමාතා ප්‍රාර්ථනාවේ මීළඟ අයැදුම නම් උදය තාරකාවෙනි යන්නයි. එය ලතින් බසින් STELLA MATUTINA යන්නේ සිංහල පරිවර්තනයයි. ඉංග්‍රීසි ප්‍රාර්ථනාවේ මේ සඳහා යෙදෙන්නේ Morning Star යන දෙපදයයි.
උදය තාරකාව යනු හිරු උදාවීමට මත්තෙන් පෙරදිග අඹරේ දිදුලන තාරකාවයි. ක්‍රිස්තුස් වහන්සේ හඳුන්වනු ලබන්නේ සාධාරණත්වයේ සූර්යයා ලෙසිනි. ඒ ධර්ම සූර්යයා උදාවීමට පෙර පෑයූ උදා තරුව වන්නේ මරියෝත්තමාවෝ ය. උදා තාරකාව අරුණෝදයේ පායා රාත්‍රිය හා උදෑසන වෙන් කරන්නා සේ ක්‍රිස්තුස් වහන්සේ ලොවට පහළ වීමට මත්තෙන් බිහිවී පාපය හා වරප්‍රසාදය අතර බෙදුමට අඩිතාලම ඇති කළ තැනැත්තිය වන්නේ මරියාවෝය.
ස්වීඩනයේ ශු. බ්‍රිජට් තුමිය මරියතුමිය හදුන්වා දෙන්නේ හිරු උදාවට පූර්වගාමී වූ තාරකාව ලෙසිනි. අඳුර හා අලෝකය අතර පවතින ද්වන්ධ සටනේ කෙළවර අලෝකය ජයගනි. අඳුර දුරලමින් උදය උදාවේ. එම ආලෝකයේ ප්‍රථම පියවර වන්නේ අරුණෝදයේ උදාවන මේ උදය තාරකාවයි.
අතීතයේ දේවස්ථානවල දේවමාතා පීඨය නොහොත් ප්‍රතිමා මණ්ඩපය නිර්මාණය කෙරුණේ නැගෙනහිර දෙසට වන්නටය. ඒ දෙව්මවුන් උදය තාරකාව වන බව පිළිබිඹු කිරීමටය.
තාරකාව හෝ තාරකා දෙව්මවුන් හා බැඳී පවතින බව පෙන්වන තවත් නිදසුන් රැසකි. ඕතොමෝ තරු දොළොසකින් යුත් කිරුළක් හිස පැළඳගෙන සිටීම හා එතුමිය මුහුදෙ දුලන තරුව ( Marisstellla ) ලෙස හැඳින්වීම ඊට නිදසුන් වේ.
උදය තාරකාවෙනි , අප නිසා යාච්ඤා කළ මැනව.
රෝගීන්ගේ ආරෝග්‍යයෙනි
දේවමාතා ප්‍රාර්ථනාවේ මීළඟ යැදුම වන්නේ "රෝගීන්ගේ ආරෝග්‍යයෙනි " යන්නයි. එය ලතින් ප්‍රාර්ථනාවේ හමුවන "Salus Infirmorum" යන යැදුම සිංහල බසට නංවා ඇති අයුරුය. එය ඉංග්‍රීසි ප්‍රාර්ථනාවේ හමුවන්නේ Health of the Sick ලෙසිනි.
අපගේ දිව්‍ය වෙදැදුරාණන් නොහොත් අපේ රෝදුක් දුරලන සැබෑ බලය වනුයේ අවිවාදයෙන්ම ක්‍රිස්තුස් වහන්සේමය. එසේ නම් අපි දේවමාතාවන් වහන්සේට රෝගීන්ගේ ආරෝග්‍යය යැයි කියන්නේ මන්ද ? රෝගීන් සුව කිරීමෙහිලා ක්‍රිස්තුස් වහන්සේ සතුවූ දිව්‍ය බලය උන්වහන්සේ සිය ශ්‍රාවකයින් හට ලබාදුන් සේක. ඒ අනුව ඔව්හු විවිධ ලෙඩ රෝග දුරුකළ අයුරු අපෝස්තුලුවරුන්ගේ ක්‍රියා පොත අපට අනාවරණය කරයි. ක්‍රිස්තුස් වහන්සේගේ ප්‍රධානතම හා සමීපත්ම ශ්‍රාවිකාව වන්නේ මරියෝත්තමාවන් ය. ඒ අනුව ඕතොමන් වෙතත් ඒ දිව්‍යමය බලය තිබෙන බව අපට අවබෝධ කරගත හැක.
ශු. සයිමන් ස්ටොක් තුමා මරියතුමී හඳුන්වන්නේ පව්කාරයින්ගේ ඖෂධය නමිනි. සාන්ත බොනවෙන්චර් තුමා පවසන්නේ මරියාවන්ගෙන් උදව් පිහිට පතා එන්නවුන්ට එතුමිය සුවදායිකාව වන බවය. ලූර්දු , පාතිමා වැනි සුපතල වන්දනාස්ථාන මීට කදිම නිදසුන් වේ. අදද සැදැහැවත්තු දස දහස් ගණනින් මේ පූජ්‍යස්ථාන වෙත එක් රොක් වන්නේ ඕතොමන් රෝගීන්ගේ ආරෝග්‍ය බව විශ්වාස කරන බැවිනි.
ලතින් බසින් infirmus යන්න අස්ථාවරභාවය හඟවයි. (Not firm) ඉන් දුබල, දුර්වල , බෙලහීන යන අදහස ප්‍රකාශ වේ. එමෙන්ම මේ Salus Infirmorum යන්නෙන් සදාතනික සුවය ද හැඟවේ. Salus යන්නෙන් ගැලවීම ද ප්‍රකාශ වන හෙයිනි එය සදාතනික විමුක්තියද ප්‍රකාශ කරන පදයකි. (Salus = Salvation )
මේ අනුව මරියෝත්තමාවෝ ආරෝග්‍ය දේවමාතාවන් යන නමින් බුහුමන් ලබති. ලොව පුරා ආරෝග්‍ය දෙව්මවුන්ට කැපකළ පූජනීය ස්ථාන රාශියක් පිහිටා ඇත. ඉන්දියාවේ වේලන්කන්නි පුදබිම ඒ අතර ප්‍රකට වන්දනාස්ථානයකි.
අතිරේක තොරතුරු කීපයක්.
ශ්‍රී ලංකාවේ ද ආරෝග්‍ය දේවමාතාවන් නමට කැපකළ දෙව්මැදුරු රැසකි. වේලන්කන්නි මාතාවන්ගේ නාමයද ආරෝග්‍ය මාතාව,ආරෝකිය මාතා යනාදී නම් හා යාව පවතින බැවින් ඒ නමට කැපකළ දේවස්ථානද සමඟින් ගත් කල දිවයිනේ වැඩිම දේවමාතා දේවස්ථාන ප්‍රමාණයක් ඇත්තේ මේ නමින් බව පෙනේ.
අගරදගුරු වසමේ මාබෝල, කොළඹ සෙක්කුවීදිය, සේදවත්ත, පතඟිගොඩැල්ල, මන්නාරමේ නානත්තන් ආදි දේවස්ථාන ගණනාවක් මේ නමට කැපකර ඇත. මාබෝල දේවස්ථානයේ මොගොප්පුව මත ඉතා පැහැදිලිව Salus Infirmorum ලෙස ලතින් බසින් සටහන්ව ඇත. එම දේවස්ථානයේ තැන්පත් කර ඇති ඓතිහාසික ප්‍රතිමාව ආරෝග්‍ය මෑණියන් නමින් ගරුබුහුමන් ලබයි.
රෝගීන්ගේ ආරෝග්‍යයෙනි අප නිසා යාච්ඤා කළ මැනව.
පව්කාරයින්ගේ අඩක්කලමෙනි
දේවමාතා ප්‍රාර්ථනාවේ මීළඟ අයැදුම වන්නේ පව්කාරයින්ගේ අඩක්කලමෙනී යනුවෙන් පරිවර්තනය වී ඇති ලතින් බසින් Refugium Peccatorum ලෙස ඇති නාමයයි. මේ සුවිශේෂී නාමය ඍජුවම ක්‍රිස්තුස් වහන්සේ ඉටුකළ ගැළවීමේ කාර්යය තුළ මරියෝත්තමාව සතු භූමිකාව සනිටුහන් කරයි.
ඉංග්‍රීසි බසින් මෙය යෙදෙන්නේ Refuge of sinners ලෙසිනි. Refugium හෝ Refuge යන වදනින් අදහස් කෙරෙන්නේ සරණය නැතහොත් පිළිසරණය හෝ රැකවරණය යන්නයි. ඒ අනුව මෙහි නියම අදහස වනුයේ පව්කාරයින්ගේ සරණයෙනි යන්නයි. එහෙත් මීට යෙදී ඇත්තේ දමිළ වදනින් බිහිවූ 'අඩක්කලමෙනි' යන පදයයි. Refugium Peccatorum සඳහා දමිළ බසින් ඇත්තේ "පාවිකළින් අඩෛක්කලම්" යන දෙවදනයි. ඒ අනුව දමිළ හා සිංහල වචන දෙකෙහි කිට්ටු සබැඳියාව අපට පෙනේ.
සාන්ත සභාව ඕතොමන් "සහය ගැළවුම්කාරිය" ලෙස ගෞරවාන්විතව අමතනුයේ මේ හේතුවෙනි. දේවමාතාවෝ කුරුසිපත් තම පුතුන් අභිමුව දේව ජනතාවට පාපි බවින් මිදීම ලැබෙනු වස් යදිති. එතුමිය මාතෘක රැකවරණයෙන් අප හැම වසාගැනීමට සූදානමින් සිටින්නීය. එතුමිය පාපය තරයේ පිළිකෙව් කළද පව්කරුවා සෙනෙහසින් වැළඳ ගනියි. නමෝ මරිය යැදුමේදී අපි යදින්නෙ "සාන්ත මරියනී දේවමෑණියනී, පාපිවූ අප නිසා දැනුත් අපේ මරණ වෙලේදිත් යාච්ඤා කළ.මැනව" කියමිනි.
ශු. ජෝන් ඩැමසින් තුමා එතුමිය නම්කරන්නේ තමන් කරා පළා එන සැමට රක්ෂස්ථානය වන නුවරක් ලෙසය. මෙහිලා එතුමන් පාදක කරගන්නේ පැරණි ගිවිසුමේ ද්විතීය නීති සංග්‍රහයේ 19 වන පරිච්ඡේදයේ හමුවන "අභය භූමි නගර" පිළිබඳ අදහසයි. එදා පිළිසරණ පතා අපරාධකරුවන් එම නගර කරා දිව ගොස් තම ජීවිතය රැකගත් සේ අද පව්කාරවූ අපි එතුමිය වෙත දිවයමු. එතුමියගේ සිරි සළුවෙන් සියළු පව්කාරයින් වසාගනිමින් ඒ බයිබලයේ හමුවන අභය භූමි සේ ඔවුන්ට රැකවරණය සලසන බව මෙහි අදහසයි.
ක්ලෙයාවෝර්හී ශු. බර්නාඩ් තුමා එතුමිය හඳුන්වන්නේ පව්කාරයින්ගේ හිණිමඟ (Ladder of the sinners) ලෙසිනි. ශු. අල්ෆොන්සස් මාරි ලිගෝරි තුමා පවසන්නේ මරියතුමි උත්පත්ති පොතේ මැවීමේ කතාන්දරයේ හමුවන කුඩා ආලෝකය එනම් චන්ද්‍රයාට සමාන බවයි. ඕතොමෝ පාපය නම් රාත්‍රියේ අඳුර පළවා හැර අප ජීවිත එකලු කරන චන්ද්‍රයා වෙති.
iii වන ඉනසන්ට් පාප්තුමා පවා මෙවැනිම අදහසක් ඉදිරිපත් කරමින් පවසනුයේ පාපය නම් අඳුරු රාත්‍රියේ වෙසෙන්නෝ චන්ද්‍රයා නම් මරියාවන් දෙස බලා සිය පාපයේ යථා ස්වරූපය හඳුනා ගැන්මට අවශ්‍ය ආලෝකය ලබත්වා කියාය. ශු. එෆ්‍රම් තුමා දේවමාතාවන් අමතා යදින්නෙ " නමෝ පව්කාරයින්ගේ පිළිසරණයෙනි, ඔබ පමණක් පව්කරුවන් වෙනුවෙන් මැදිහත් වන්නීය" යැයි කියමිනි.
පව්කාරයින්ගේ අඩක්කලමෙනි යනුවෙන් මරියෝත්තමාවන් අමතනු ලැබීම ඇරඹී ඇත්තේ ක්‍රි.ව. 8 වන සියවසේ විසූ කොන්ස්තන්තිනෝපලයේ ශු. ජර්මානුස් තුමාගේ මූලිකත්වයෙනි පසුකාලීනව මේ බැතිය ජේසු නිකායිකයන් විසින් ව්‍යාප්ත කර ඇත. එතුමිය නමින් මංගල්‍යය සැමරෙන්නේ සැප්තැම්බරයේ මුල් සති දෙකෙහිය.
පව්කාරයින්ගේ අඩක්කලම වන දේවමාතාවන්ගේ නමින් දේවස්ථාන රැසක් දිවයිනේ පිහිටා ඇත. තුඩැල්ල, යාපනය හතරවන හරස් වීදිය, අන්නයිකොඩ්ඩෙයි, පුදුමාතලන්, පුත්තලම , වයික්කාල, කටුපොත, මන්නාරම් පදවියේ එලුතූර් , ඉලුප්පයිකුලම් , කන්නඩ්ඩි , මූන්කිල්මුරිච්චාන්, ආර්තිමොඩ්ඩෙයි, නොච්චිකුලම් මීට නිදසුන් වේ.
තුඩැල්ල අඩක්කල මාතා සියවන ජුබිලිය අරබයා ජේ.කේ.එස්. පෙරේරා ගීතිකා රචකයා මෙලෙස පබඳා ඇත.
සාගරේ තරුවෙනි........
ලෝවිලේ සොවගිනි තැවෙන සතට කුලුනෙනි
සරණ වනු මැනේ මවේ නමෝ මරියනි
පාපි සරණයේ දේව දිනිතියේ අපට මෙලොව ඇති සැපේ ඔබ පැසසුම වේ.
පව්කාරයින්ගේ අඩක්කලමෙනි අප නිසා යාච්ඤා කළ මැනව.
වික්ෂිප්තයින්ගේ සැනසීමෙනි
දේවමාතා ප්‍රාර්ථනාවේ මීළඟ අයැදුම වන්නේ ලතින් බසින් Consolatrix Afflictorum යන්නයි. ඊට සිංහල බසින් වික්ෂිප්තයින්ගේ සැනසීමෙනි යන දෙවදනත්, ඉංග්‍රීසි බසින් Comforter of the afflicted යන වැකියත් යෙදේ.
මෙම අයැදුම මඟින් ඉස්මතු කෙරෙන්නේ ඕනෑම අවස්ථාවකදී අප හට සහය වීමෙහිලා දේවමාතාවන් සතු හැකියාවයි. වෙසෙසින්ම අපේ අපහසුතා, දුක්පීඩා, කරදර හමුවේ ඕතොමෝ අප වෙනුවෙන් මැදිහත් වීමයි.
කුරුසිය පාමුල සිටිමින් තම පුතුගේ මරණය දෙස බලා සිටි එතුමිය අත්දුටු අධ්‍යාත්මික ප්‍රාණපරිත්‍යාගීත්වය තුළ අපට සහය වීමේ හැකියාව එතුමිය තමන් සතු කරගත්තාය. ශු. එෆ්‍රම් තුමා මරියෝත්තමාවන් හඳුන්වන්නේ ලෝකයේ සැනසිලිදායිකාව, අනාථයින්ගේ මාතාව, සිරකරුවන්ගේ විමුක්තිය සහ වහලුන්ගේ මිදීම ලෙසිනි.
දේවමාතාවන් අරබයා මේ විරුදාවලිය ඈත අතීතයේ සිටම එන්නකි. පසුකාලීනව මෙය අගුස්තීනු නිකායික ශ්‍රමණයන් හරහා තවදුරටත් පැතිරී ගිය බව පෙනේ. ඒ ඔස්සේ සැනසිලිදායක මෑණියන් යනුවෙන් දේවමාතා භක්තියක් ගොඩනැඟිණි.
මංගල්‍යය ආරාධනාව තුළ පවා "පරදේශවාසිවූ අපි ඒව අම්මාගේ දරුවෝ ඔබටම අඬගසම්හ, මේ කඳුළු විලේ හ‍ඬා වැළපී ඔබටම සුසුම්ලම්හ..." යනුවෙන් සිහිපත් කෙරෙන්නේ එතුමිය වික්ෂිප්තයින්ගේ සැනසීම බවය.
සැනසිලිදායක මාතාවන්ට කැපකළ දේවස්ථානයක් කොළඹ අගරදගුරු පදවියේ තිබ්බොටුගොඩ මීසමට අයත් ගණේමුල්ල නගරයේ පිහිටා ඇත. එය අඩසියවසකට වඩා පැරණි අතීතයකට උරුමකම් කියන්නකි.
වික්ෂිප්තයින්ගේ සැනසීමෙනි, අප නිසා යාච්ඤා කළ මැනව.
ක්‍රිස්තියානින්ගේ පිහිටෙනි
ලතින් ප්‍රාර්ථනාවේ හමුවන AUXILIUM CHRISTIANORUM යන යැදුම් පාඨය ඔස්සේ සිංහලෙන් "ක්‍රිස්තියානින්ගේ පිහිටෙනි" හා ඉංග්‍රීසි බසින් Help of Christians යන අයැදුම් ගොඩනැඟී ඇත.
මරියෝත්තමාවෝ හැම කල්හීම දේව ජනතාවගේ සහයට ඉදිරිපත් වූහ. එදා කානාහී විවාහ මංගල්‍යය අවස්ථාවේ පිහිට වූ සේ ඕතිමෝ සැමකල්හීම ක්‍රිස්තියානින්ට පිහිට වන්නාහ.
ඈත අතීතයේ පටන් ග්‍රීසියේ හා ඊජිප්තුවේ මුල් කිතුනුවෝ දෙව්මවුන් හැඳින්වීමට බොඑතෙයියා (Boeteia) යන වදන යොදාගෙන ඇත. එයින් අදහස් කෙරුණේ ස්වර්ගයේ සිට ආධාර රැගෙන එන පුද්ගලයා යන්නයි.
ශු. ජෝන් ක්‍රිසොස්තම් තුමා 345 දී දෙව්මවුන් අරබයා යදින්නෙ "අහෝ මරියනී, ඔබ දෙවිඳුන්ගේ බලවන්තම පිහිටාධාරයයි" යනුවෙනි.
මෙහිදී වෙසෙසින්ම අවධානයට යොමුවන්නේ විවිධ දුර්ලබ්ධීන් හා වැරදි ක්‍රිස්තියානි ඉගැන්වීම් පැතිර ගිය අවස්ථාවල ඒවා මැඩලීමට මරියෝත්තමාවෝ ඉදිරිපත් වූ අයුරුත් ඒ වෙනුවෙන් ඕතොමෝ සාන්ත සභාවට පිහිට වූ අයුරුත් ය. ඒ ඔස්සේ දේවමාතාවන් හට ක්‍රිස්තියානින්ගේ පිහිටාධාර මෑණියන් යන විරුදාවලිය ඈඳී ඇත.
මෙහිදී සුවිශේෂී ලෙස කරලියට එන්නේ ක්‍රි.ව. 1571 දී ඔටෝමන් තුර්කිවරුන් පරදා කිතුනු හමුදා ලෙපන්ටෝ නම් ස්ථානයේදී ලද ජයග්‍රහණයයි. එහි ප්‍රතිඵලයක් ලෙස V පියුස් පාප් වහන්සේ "ක්‍රිස්තියානින්ගේ පිහිටෙනි" යන අයැදුම දේවමාතා ප්‍රාර්ථනාවට එකතු කළේය.
පසුකාලීනව 1814 දී VII පියුස් පාප් වහන්සේ තමන් නැපෝලියන්ගේ සිරභාරයෙන් මිදීම උදෙසා දෙව්මවුන්ට කරන ස්තුතියක් ලෙස මැයි මාසයේ 24 දා දිනය ක්‍රිස්තියානින්ගේ පිහිටාධාර මෑණියන්ගේ මංගල්‍යය ලෙස ස්ථාපිත කළේය.
පසුකාලීනව පිහිටාධාර මාතාවන් සම්බන්ධයෙන් වූ භක්තිය ප්‍රවර්ධනයෙහිලා දායක වූයේ ශු. ජෝන් බොස්කෝ තුමාය. එතුමා ඇරඹූ සැලේසියානු නිකායේ ආරක්ෂිකාව ලෙස නම් කෙරුණේද පිහිටාධාර මෑණියන් ය.
පැරණි යැදුම්වලද මේ දැක්ම හමුවේ. දේවමෑණියන්ට යාච්ඤාවේ අපි යදින්නෙ " ස්වාමිදරුවන්ගේ සුවිශුද්ධවූ මෑනියනී අපි ඔබගේ සරණය සොයමිනි එමු..." යැයි කියමිනි. මංගල්‍යය ආරාධනාවේ අපි යදින්නෙ " අපේ ආධාරයෙනි මංගල්‍යයස්තු " කියමිනි.
සදාසරණ මාතා බැතිය ද මේ සමඟ නෑකම් කියන්නකි. පිහිටාධාර මෑණියන්ට කැපකළ බැසිලිකා දේවස්ථානය ඉතාලියේ ටියුරින් නුවර පිහිටා ඇති අතර මෙරට ඒ නමින් කැපකළ දේවස්ථාන මීගමුව සැලේසියානු පැවිදි ආරාමය තුළත්, යාපනයේ මාරිස්සන්කූඩල් මීසමේ සහයපුරම් හා කරවෙඩ්ඩි මීසමේ තුනලෙයි ගම්මානවලත් පිහිටා ඇත.
මා මව්නී අති ප්‍රේමනීය, මේ ලෝකේ මගෙ ආධාර ........
නිති සරණය දෙන මරිමව කඩ නොව.......
දුබල අපට සෑමදා සරණ වන මවේ......
ප්‍රශංසනීය මාතෘනි ලබා දෙන් පිහිටෙනි.....
ආදි ගීතිකා පද රැසක් මීට සාක්ෂි දරයි.
ක්‍රිස්තියානින්ගේ පිහිටෙනි, අප නිසා යාච්ඤා කළ මැනව.
සුරතාවයින්ගේ රාජේශ්වරියනි
දේවමාතා ප්‍රාර්ථනාවේ අවසන් යැදුම් පද මාලාව තුළ දේවමාතාවන් වහන්සේ අමතනු ලබන්නේ රාජේශ්වරියනි යනුවෙනි. එහිදී එතුමිය සකල විශ්වයේම පමණක් නොව ගැළවීමේ ඉතිහාසයේද රැජින ලෙස බුහුමන් ලබයි.
දේවමාතා ප්‍රාර්ථනාවේ බොහෝවිට සදොස් ලෙස උච්චාරණය වන යැදුමක් වන මෙය බොහෝ දෙනෙක් භාවිතා කරන්නේ සූරතාවයින්ගේ යනුවෙනි. එය සුරතාවයින්ගේ ලෙස නිවැරදි කරගැනීමද අවශ්‍ය වේ.
එම අයදුම් අතර පළමු වැන්න එතුමියව ඉදිරිපත් කරන්නේ සුරතාවයින්ගේ රාජේශ්වරිය ලෙසිනි. එනම් දේවදූතයින්ගේ රාජිනිය විලසිනි. ශු. පාවුලු තුමන්ගේ ක්‍රිස්තුවේදී ඉගැන්වීම් තුළ ක්‍රිස්තුස් වහන්සේ සියළු ස්වර්ගීය බලතාවයන් මැවූ බව හමුවේ. (කොලොස්සි 1;6) ඒ අනුව මරියෝත්තමාවෝ දේවදූතයින් මැවූ දෙවිඳුන්ගේ පුතුට මව් වීම නිසා නිතැතින්ම ඕතොමෝ ඔවුන්ට රාජිනිය වේ.
ශු. ජෝන් ඩැමසින් තුමාට අනුව දෙව්මවුන් මැවුම්කරුවාණන්ගේ මෑණියන් වන නිසා ඕතොමෝ සකල මැවිල්ලේ රැජින වෙති. සාන්ත සභාවේ පිළිගත් නිල යැදුම් කීපයකම එතුමිය රැජිනක් ලෙස අමතනු ලැබේ.
පරලෝක රාජේශ්වරියනි (Regina Coeli)
මංගල්‍යස්තු රාජේශ්වරියනි (Salve Regina)
"මරියෝත්තමාවෝ ස්වර්ගයට ගෙන යන ලද්දාහ. සුරදූත සේනාවෝ ප්‍රීති සන්තෝෂ වන්නාහ", යනුවෙන් ස්වර්ගාරෝපණ මංගල්‍යය දින සුපුවත් ජයනදෙහි ගැයේ. ඉන් පැවසෙන්නේත් දේවදූතයින් එතුමිය තම රාජිනිය ලෙස පිළිගන්නා බවයි.
මෙම විරුදාවලිය තුළින් උපන් දේවමාතා බැතිය වඩාත් පැතිර යන්නේ ෆ්‍රැන්සිස්කාන ධර්මදූතවරුන්ගේ අනුග්‍රහයෙනි. ඊට තුඩුදුන් ප්‍රධාන සාධකයක් වන්නේ අසීසියේ ශු. ෆ්‍රැන්සිස් තුමා තම දූත මෙහෙවර අසීසියේ පොර්සියුන්කුලා (Portiuncula) නමින් ප්‍රකට සුරතාවයින්ගේ රාජේශ්වරියගේ දේවස්ථානය කේන්ද්‍ර කරගනිමින් දියත් කිරීමය. අදටත් එහි පිහිටා ඇති බැසිලිකා දේවස්ථානය තුළ එම ඉපැරණි කුඩා දෙව්විමන ඉතිරි කර ඇත.
සුරතාවයින්ගේ රාජේශ්වරිය නමින් කැපකළ දේවස්ථාන දෙකක් මෙරට පිහිටා ඇත. ඉන් එකක් කොළඹ අගරදගුරු වසමේ රාවතාවත්ත දේවස්ථානයයි. අනික වන්නේ මඩකලපුව රදගුරු වසමේ මාංකර්නි දේවස්ථානයයි.
දකිම් මගේ මවුන් සුර දනන් මැදේහි
දිව කිරුල් දැරී වසයි සුපින්වතී
(ගී කළඹ 61 පිටුව)
සුරතාවයින්ගේ රාජේශ්වරියනි අප නිසා යාච්ඤා කළ මැනව
ආදිපිතෘවරුන්ගේ රාජේශ්වරියනි
දේවමාතා ප්‍රාර්ථනාවේ මීළඟ අයැදුම වනුයේ ලතින් බසින් "Regina Patriacharum" ඇසුරින් නිපන් ආදිපිතෘවරුන්ගේ රාජේශ්වරියනි යන්නයි.
ආදිපිතෘවරුන් යනු ගැලවීමේ ඉතිහාසයේ මුල් කාලවකවානුව නියෝජනය කරන ආදි පියවරුන් ය. ඔවුන් අපගේ විශ්වාසයේ විරුවන් මෙන්ම ඉශ්‍රායෙල් ගෝත්‍රයන්හී මූලිකයෝය. ප්‍රධානතම ආදිපිතෘවරුන් ලෙස සැලකෙන්නේ ආබ්‍රහම්, ඊසාක්, ජාකොබ් තිදෙනාය. එපමණක්ද නොව මෝසස්, දාවිත් වැන්නවුන් පවා මේ ගණයේලා සැලකුණු බව පෙනේ.
දෙවියන් වහන්සේ මෙසියස් තුමාණන් ලොවට අනාවරණය කළේ මේ ආදිපිතෘවරුන් මඟිනි. එසේම ඔවුන් බොහෝවිට ක්‍රිස්තුස් වහන්සේගේ පූර්ව සලකුණු මෙන්ම පැරණි ගිවිසුම තුළ ක්‍රිස්තුස් වහන්සේ නියෝජනය කළ අයද වූහ.
මරියෝත්තමාවෝ මේ ආදිපිතෘවරුන් කෙරෙන් පැවතෙන තැනැත්තියකි. ඕතොමෝ ඇදහිල්ල තුළත් ලේ නෑකම තුළත් මේ ආදි පියවරුන්ගේ දියණියක් වන්නීය. ඒ අනුව මරියෝත්තමාවන් හැඳින්වීම සඳහා ආදිපිතෘවරුන්ගේ රාජේශ්වරියනි යන නාමය යෙදීම කිසිසේත් අනුචිත නොවේ.
මරිය තුමිය සඳහා මේ නාමය යෙදීම මඟින් ඉස්මතු කෙරෙන්නේ එතුමිය තෝරා ගනු ලැබූ ජනතාවගේ එනම් එතුමියගේම මිනිසුන්ගේ රාජිනිය බවයි. ලූක් සුබාරංචියේ හමුවන එතුමිය දෙවිඳුන් අරබයා ගැයූ උදාන ගීයේ "අප පියවරුන් වූ ආබ්‍රහම්ට හා එම පරපුරට සදහටම පොරොන්දු වූ ලෙසට සිය සේවක ඉශ්‍රායෙල් සෙනඟ හට දයාව පෙන්වා පිහිටවූ සේක" යනුවෙන් අපට හමුවේ.
"අප පියවරුනට වදාළ සේ මෙහෙකරු සැමටම සරණ වුණා ...." යනුවෙන් නන් වර ලැබදී ගීතිකාවේ හමුවේ.
ආදිපිතෘවරුන්ගේ රාජේශ්වරියනි අප නිසා යාච්ඤා කළ මැනව.
දිවස්ප්‍රසාදීන්ගේ රාජේශ්වරියනි
මරියෝත්තමාවන් රාජිනියක් ලෙස සලකන වැකි අතර මීළඟට අපට හමුවන්නේ ඕතොමෝ දිවස්ප්‍රසාදීවරුන්ගේ රැජින ලෙස සැලකීමයි. එය සිංහලෙන් තැනෙන්නේ ලතින් ප්‍රාර්ථනාවේ එන Regina Prophetarum යන යැදුමිනි.
දිවැසිවරයා යන බයිබලීය යෙදුමේ සැබෑ අරුත වන්නේ දෙවිඳුන්ගේ පණිවිඩය ප්‍රකාශ කරන්නා යන්නයි. එනම් දේව වචනය ලොවට පිරිනමන්නා යන්නයි. ක්‍රිස්තුස් වහන්සේ වනාහි මාංශගත වූ දේව වචනය නිසා උන්වහන්සේව ලොවට ප්‍රකාශ කිරීම මඟින් දෙව්මවුන් පිළිබිඹු කළේ ඕතොමන් ද දිවැසිවර භූමිකාවට පණ පොවන බවයි. ඒ අනුව එතුමිය සෙසු දිවැසිවරුන්ටත් වඩා ඉහළින් වැජඹෙන ශ්‍රේෂ්ඨතම දිවැසිවරිය ලෙස අතීතයේ පටන් හඳුනාගනු ලැබීම අමුත්තක් නොවේ.
අනෙක් අතට එතුමිය තම මෙහෙවර අතරතුර දිවැසිවරියක ලෙස කටයුතු කළ බවද අපට පෙනේ.
එතුමිය ගැයූ උදාන ගීය තුළ ඊට නිදසුන් දැකිය හැක. ශු. ඉරනේවුස් නම් සභා පියතුමා මරියාවන්ගේ උදාන ගීය තුළ ඕතොමන් පෙන්නුම් කළ දිවැසිවරභාවය ඉදිරිපත් කරයි.
එසේම දිවැසිවර කැඳවීමට අනන්‍ය වූ ලක්ෂණ එතුමියගේ සුවිශේෂී කැඳවීම තුළද හඳුනා ගත හැක. මේ සියල්ල විමසා බලන කල පෙනෙන දේ නම් එතුමිය තුළ පැවති දිවැසිවරභාවයයි. මුල්කාලීන කිතුනු ප්‍රජාව එතුමියව දිවැසිවරියක සේ සැලකූ බව පෙනේ.
උත්පත්ති පොතේ පටන්ම ඉදිරිපත් වන අනාගත මෙසියස් වරයා සම්බන්ධ දිවැසිවර ප්‍රකාශනයන් තුළ දෙව්මවුන්ගේ භූමිකාව ද වක්‍රව ගැබ්ව පවතී. දිවැසිවරු හැමවිටම උත්සාහ දැරුවේ ජනතාව පවින් මුදා ඔවුන්ගේ ජීවිත යළි ගොඩනැඟීමටයි. මරියාවෝ පියවර ගත්තේ ජනතාව පවින් මුදවා යළි ගොඩනැඟීම වෙනුවෙන් තම එකම පුතු පවා පූජා කිරීමටයි.
එලෙස මරියෝත්තමාවන් පැරණි ගිවිසුමේ හමුවන මහ සුළු මෙන්ම දේශක දිවැසිවරු හැමට ශ්‍රේෂ්ඨව වැඩ වසන නිසා එතුමිය දිවස්ප්‍රසාදීන්ගේ රාජේශ්වරිය ලෙස සැලකීම යුක්තිසහගත බැව් පෙනේ.
දිවස්ප්‍රසාදීන්ගේ රාජේශ්වරියනි අප නිසා යාච්ඤා කළ මැනව.
අපෝස්තුලුවරුන්ගේ රාජේශ්වරියනි
දේවමාතා ප්‍රාර්ථනාවේ තවත් එක් අයැදුමක් වනුයේ දෙව්මවුන් අපෝස්තුලුවරුන්ගේ රාජේශ්වරිය ලෙස හැඳින්වීමයි. එනම් ජේසුස් ක්‍රිස්තුස් වහන්සේ විසින් තෝරා ගනුලැබූ ශ්‍රාවකයන් අතර මරියෝත්තමාවගේ භූමිකාව කෙසේදැයි භාවනා කිරීමයි.
මෙය දෙව්මවුන් අරබයා පවතින ඉපැරණි බැතිය තුළ පවා විද්‍යාමාන වූවකි. පෙන්තකෝස්ත දින සේනාකුලු උඩු මහල් ශාලාවේ සිදුවූ ශුද්ධාත්ම ආගමනය අවස්ථාවේ අපෝස්තුලුවරුන්ගේ දූත මෙහෙවර ආරම්භ වූයේ මරියෝත්තමාවන්ගේ පූර්ණ මධ්‍යස්ථභාවය සමඟිනි.
ක්‍රිස්තුස් වහන්සේගේ ස්වර්ගාරෝහණයෙන් පසු දේවමාතාවන් අපෝස්තුලුවරුන් හා සෙසු ශ්‍රාවකයන් සමඟ උඩුමහලේ රැඳෙමින් ශුද්ධාත්ම ආගමනය අපේක්ෂාවෙන් යාච්ඤා කළ බව අපෝස්තුලුවරුන්ගේ ක්‍රියා පොතේ අපට හමුවේ. ඕතොමෝ අපෝස්තුලුවරුන් එකතු කරගනිමින් ඔවුන්ට මවක් වූ බව අපට අවබෝධ කරගත හැක. තවද ඒ තුළ එතුමියද එක්තරා ආකරයකින් අපෝස්තුලුවරියක් බව බොහෝ විශාරදයෝ පවසති.
මේ සියල්ල තුළ අපට හඳුනා ගත හැකි දේ නම් දේවමාතාවන් අපෝස්තුලුවරුන්ගේ රාජේශ්වරිය ලෙස නම් කිරීම ශු. බයිබලීය පසුබිමක් සහිතව ගොඩනැඟුණු ධර්මදූතික ජ්වලිතභාවය හා යාවූ විරුදාවලියක් බවයි.
මෙම බැතිය ප්‍රවර්ධනයෙහිලා පැලොටින් පියවරුන්ගේ පැවිදි නිකායෙන් (Pallottine Fathers ) ලද දායකත්වය සුවිශේෂීය. ඔවුන්ගේ ඉල්ලීම මත ශුද්ධාසනය විසින් 1890 වසරේදී අපෝස්තුලුවරුන්ගේ රාජේශ්වරිය නමින් විශේෂ මංගල්‍යයක් පවා ස්ථාපිත කරන ලදි. ඒ සමිඳාණන්ගේ ස්වර්ගාරෝහණ මංගල්‍යයට පසු සෙනසුරාදාය.
අප රටේ අපෝස්තුලුවරුන්ගේ රාජේශ්වරිය නමින් කැපකළ දේවස්ථානයක් කුරුණෑගල රදගුරු වසමේ දඹදෙණිය සිරිගල ග්‍රාමයේ පිහිටා ඇත. එය දශක තුනකට පමණ පෙර ඉදිකරන ලද්දකි.
අපෝස්තුලුවරුන්ගේ රාජේශ්වරියනි අප නිසා යාච්ඤා කළ මැනව.
වන්දනාවාදීන්ගේ රාජේශ්වරිනි
දේවමාතා ප්‍රාර්ථනාවේ මරියෝත්තමාව රාජිනියක් සේ සලකා කෙරෙන අයැදුම් වලින් එකක් වන්නේ ලතින් ප්‍රාර්ථනාවේ Regina Confessorum වෙනුවෙන් සිංහල ප්‍රාර්ථනාවේ හමුවන වන්දනාවාදීන්ගේ රාජේශ්වරිනි යන්නයි.
ලතින් වදනින් හැඟවෙන්නේ කිතුනු විශ්වාසය ප්‍රසිද්ධියේ ප්‍රකාශ කළ ශුද්ධවත් චරිතයන් ය. මුල් වකවානුවේ සාන්ත සභාවේ වෙසෙස් තැනක් ලත් ප්‍රාණපරිත්‍යාගීවරුන් නොවන සාන්තුවරුන් පිරිස පොදුවේ මේ නමින් සැලකේ.
කිතුනු විශ්වාසය ප්‍රකාශ කරන ප්‍රධානම මාර්ගය වන්නේ වන්දනාවයි. ලතින් බසින් Lex orandi lex credendi යනුවෙන් ඇති ප්‍රකට කියමනින් පැවසෙන්නේ අපි අදහන දේ අපේ යාච්ඥාව එනම් වන්දනාව තුළින් ප්‍රකාශ වන බවයි. එමනිසා සිංහල ප්‍රාර්ථනාවේ Confessors යන වදන සඳහා වන්දනාවාදීන් යන වදන යොදන්නට ඇතැයි අනුමාන කළ හැක.
වන්දනාවාදීන් යනු ප්‍රසිද්ධියේ ධර්මය දේශනා කිරීම තුළින් විශ්වාසය ප්‍රකාශ කළ , තම ධර්මදූත මෙහෙවර තුළින් විශ්වාසය ප්‍රකාශ කළ , තම ලේඛන පොත පත තුළින් විශ්වාසය ප්‍රකාශ කළ , ශාරිරිකව ප්‍රාණපරිත්‍යාගීත්වය නොලැබුවද විවිධාකාර ක්‍රමවලින් කායික වද වේදනා වලට දඬුවමට භාජනය වූ එසේම තාපස දිවිය හෝ ආරාණ්‍යවාසි දිවිය තුළින් විශ්වාසය ප්‍රකාශ කළ වීරෝදාර පිරිසයි. ඒ අනුව ඔවුන් අධ්‍යාත්මික ප්‍රාණපරිත්‍යාගීවරුන් ලෙසද සැලකේ.
තවත් අතකින් කන්‍ය මරියාවන්ද ප්‍රසිද්ධියේ තම විශ්වාසය ප්‍රකාශ කළ ශ්‍රේෂ්ඨතම උත්තමාවිය ලෙස බුහුමන් ලබයි. ඒ අනුවද ඕතොමෝ වන්දනාවාදීන් අතර අගතැන් ගන්නීය.
වන්දනාවාදීන්ගේ රාජේශ්වරිනි අප නිසා යාච්ඥා කළ මැනව.
මතු සම්බන්ධයි...
සටහන : මාධව ජයකොඩි
